Rai halai sobu Auto Estrada iha Suku Oques Postu Administrativu Maucatar no Suku Labarai Postu Administrativu Suai Vila, Munisípiu Covalima too agora seidauk hadia. Imajen/Tatoli/Eugénio Pereira.

DILI, 14 fevereiru 2022 (TATOLI)—Deputada Maria Anabela Savio, relata relatóriu fiskalizasaun komisaun E trata asuntu infraestrutura ne’ebé hala’o iha loron 29 setembru no 02 outubru 2021, husu kompañia ne’ebé halo manutensaun estrada Suai-Maucatar Lela, munisípiu Covalima, ho rigór atu bele servisu bazea item servisu ne’ebé mak sita iha kontratu.

“Rekomenda ba Obra Públika munisípiu Covalima atu orienta ba kompañia ne’ebé halo manutensaun estrada Suai-Maucatar Lela ho rigór atu bele servisu bazea item servisu ne’ebé mak sita iha kontratu,” Deputada Relatór, Maria Anabela, lee sai relatóriu komisaun E iha plenária Parlamentu Nasionál, segunda ne’e.

Tuir relatóriu fiskalizasaun komisaun E nian ne’ebé Agéncia Tatoli asesu katak, projetu manutensaun estrada Suai, Maucatar Lela, hala’o hosi kompañia Verde Caisahe Unip, Lda ho valór kontratu $242,501.42 no progresu fíziku iha terrenu atinje tiha ona 67%.

Iha flskalizasaun ne’e Komisaun observsa katak kompañia ezekuta servisu iha terrenu la tuir item ne’ebé hakerek tiha ona iha kontratu.  Servisu iha terrenu haree liu ba hamoos duut iha dalan ninin, tesi ai, no ateru estrada ho volume kuak ne’ebé ki’ik no iha terrenu komisaun haree katak estrada parte balun laiha baleta no baleta mós nakonu hela ho rai.

Tan ne’e delegasaun komisaun hateten ba Diretór Obra Públika iha futuru antes atu loke konkursu ba públiku tenke halo uluk tiha levantamentu dadus (site visit) ba servisu ne’ebé presija tebes atu halo nune’e bainhira prepara dokumentu ba projetu bele hatama servisu prinsipál sira iha Planta no Kadernu Enkargu ka Bill 0f Quantity (BoQ).

Bazea ba observasaun komisaun nian iha fatin balun presiza tebes halo valeta, atu nune’e iha tempu udan baleta bele akumula udan-been hodi labele estraga ka sobu estrada.

Tuir direjente Obra Públika munisípiu Covalima katak antes ne’e ekipa hosi Obra Públika nasinál halo tiha ona koordenasaun ho kompañia hodi halo identifikasaun ba item servisu sira ne’ebé mak seidauk ezekuta karik, hosi parte daruak sei halo konkordánsia atu aloka fali ba item servisu seluk.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here