Ministru Ensinu Superiór Siénsia no Kultura, Longuinhos dos Santos. Imajen TATOLI/Francisco Sony

DILI, 14 fevereiru 2022 (TATOLI)–João Saldanha University (JSU), segunda ne’e, hatúr fatuk dahuluk ba konstrusaun edifísiu foun iha Usleu-Hera, área dolok-oan, hodi prepara kondisaun atu garante kualidade rekursu umanu ba dezenvolvimentu nasaun.

“Lansamentu fatuk dahuluk ne’e signifikadu boot tebes atu lori universidade prepara kondisaun adekuadu ba formasaun rekursu umanu ho kualidade, hodi kontribui no kumpre mehi lori dezenvolvimentu sustentável ba rai ida-ne’e,” Ministru Ensinu Superiór Siénsia no Kultura (MESSK), Longuinhos dos Santos, hateten iha Hera.

Notísia relevante: JSU Sei Rekruta Profesór Nasionál No Internasionál

JSU nu’udar institutu ensinu superiór privadu, ne’ebé durante ne’e goza ninia autonomia rasik. Tanba ne’e, prezensa Governu iha seremónia tau fatuk dahuluk atu fó apoiu, hodi nafatin enkoraja universidade públiku no privadu estimula hadi’a di’ak liután kondisaun infraestrutura.

“Kondisaun infraestrutura iha instituisaun ensinu superiór públiku no privadu sira, kondisaun dosente no estudante sira, sala aula adekuadu, laboratóriu no biblioteka sufisiente maka bele garante kualidade ensinu aprendizajen,” nia akresenta.

Iha sorin seluk, Fundadór no Prezidente JSU, João Mariano Saldanha, relata katak orsamentu ba konstrusaun ne’e mai hosi universidade rasik inklui apoiu balun hosi Governu liuhosi MESSK, maibé la relata montante.

Tuir João, tinan ne’e sira hahú ona faze preparasaun no planu konstrusaun edifísiu, ne’ebé tuir planu sei halo andar ho sala aula 1.200 fazeadamente.

“Tinan ne’e ami sei halo preparasaun uluk lai, ita la’o tiha mak sei haree tan saida mak atu halo tuir mai, ne’ebé iha buat tolu mak ita sei instala hanesan sala aula, dormitóriu no sentru konvensaun,” nia dehan.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here