Sekertaria Jerál Organização Popular de Mulher Timor (OPMT), Florentina da Conceição Pereira Martins Smith. Imajen Tatoli/Francisco Sony.

DILI, 14 fevereiru 2022 (TATOLI)—Organizasaun Populár Mulher Timor (OPMT), hosi partidu Frente Revolsionáriu Independente (FRETILIN) sesta ne’e realiza IV konferénsia nasionál ho tema “OPMT reziliente! Hori uluk, ohin loron no aban bainrua”, iha salaun São José Catedral Vila verde, Dili, hodi diskute programa tinan lima hodi aprova estatutu no hili estrutura OPMT foun.

Hafoin halo diskusan kle’an durante loron rua kona-ba rezolusaun lima no estatutu OPMT, konferensista sira hala’o eleisaun ba órgaun nasionál OPMT ba mandatu 2022-2027, no eleisaun dahuluk refere ba órgaun unipesoál, Sekretária-Jeral OPMT, ho kandidata na’in-tolu, Florentina da Conceicão Martins Smith, Guilhermina Ribeiro no Aurora Ximenes, liuhosi eleisaun sekreta, direta no pesoál. 

Tuir komunikadu imprensa ne’ebé Agência Tatoli asesu, segunda (14/01) ne’e, haktuir tanba laiha kandidata ida hetan votu ho maiória absoluta (50%+1), iha primeira volta, tuir rejimentu haruka, kandidata sira-ne’ebé manán primeiru lugar no segundu lugar, kompete fila-fali iha segunda volta.

Iha segunda volta maioria konferensista fó konfiansa ba kandidata Florentina da Conceicão Martins Smith, nune’ e kandidata ida-ne’ e mak sai nu’udar Sekretária Jerál OPMT ba períodu 2022-2027.

Kompetisaun demokrátika ne’e haktuir regra hatuur iha Estatutu OPMT no iha Rejimentu ba IV Konferénsia Nasional.

Kandidata rua seluk, Aurora Ximenes no Guilhermina Sadanha Ribeiro, ne’ebé biar la hetan konfiansa iha Konferénsia ida-ne’ e atu kaer kargu Sekretária Jeral, sira ida-idak iha mós istória rasik oinsá kontribui ba haburas no hametin OPMT to’o ohin loron, nu’udar organizasaun-de-massa FRETILIN no Buibere FRETILIN nian.

Sekretária Jeral OPMT mak iha responsabilidade tau matan ba vida institusionál OPMT nian, tuir Estatutu haruka, ba tinan lima tuir mai.

Hafoin eleita, Sekretária Jeral OPMT, Florentina da Conceicão Martins Smith, hato’o kedas lista naran ba segundu órgaun nasionál ne’ebé hanaran Konsellu Koordenadór Nasionál (KKN).

Kandidata na’in-rua (2) ne’ebé kompete iha konferénsia ida-ne ‘e ba kargu Sekretária Jeral  hola mós parte iha lista ne’ebé  Sekretária Jeral eleita hato’o ba Konferensista sira.

Konsellu Koordenador Nasional (KKN) ne’ e kompostu hosi membru na’in-30 mak hanesan Cipriana Pereira, Guilhermina Ribeiro, Aurora Ximenes, Danina Coelho, Judite Ximenes, Ivete Oliveira, Fernanda Caldeira, Zelia Fernandes, Filomena de Almeida, Alicia Sarmento, Luisa Costa, Elda Ferreira, Niza Corsino, Lídia Gomes, Paulina Viegas, Zulmira Sarmento Sirana, Ana Sinorinha “Bi Lessa”, Olga Amaral Nunes, Luisa Bano, Beatriz Ximenes Martins, Celina Bi Bessi, Angélica da Costa, Leni Fernandes, Ana Paula Sequeira, Maria Lausina de J. X da Costa, Elisabeth Purificação, Antónia Lobato Nunes, Amélia Dos Santos, Avelina Pereira no Diana Pereira.

IV Konferénsia Nasional eleje mós Komisaun Jurisdisaun Nasionál (KJN) no Komisaun Fiskalizasaun Nasional (KFN).

Membrus KFN eleitu mak Cidália Lopes Guterres, Amelia Pinto, Nilva Guimarães, Agustina dos Santos de Jesus, Cristina Gusmão no Insménia Gusmão.

Membrus KJN eleitu mak Maria do Rosário de Araújo, Ana Ribeiro, Marcelina Mesquita, Juliana Santos Babo, Elsa Oliveira, Helena Viegas da Sousa no Domingas Casimira.

Sekretáriu Jeral no Prezidente Interinu FRETILIN, Mari Alkatiri, labele fó pose ba membru eleitu no órgaun nasionál OPMT tanba lakon ninia alin Ahmad Alkatiri, nune’e serimónia tomada pose ne’e prezide hosi Sekretária Jeral Adjunta FRETILIN, Cipriana Pereira.

Notísia Relevante: OPMT realiza konferénsia nasionál diskute direitu feto iha baze to’o nasionál

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here