Estudante Eskola ESJ Olocasa, iha postu Ossu. Imajen TATOLI/Vitorino Lopes da Costa

VIQUEQUE, 14 fevereiru 2022 (TATOLI)-Eskola Ensinu Sekundáriu Jerál (ESJ) Olocasa, iha postu administrativu Ossu, munisípiu Viqueque, laiha profesór permanente atu hanorin matéria lian portugés ba estudante sira.

“Durante ne’e profesór lian portugés iha, maibé na’in-rua mate hotu, tanba ne’e agora laiha,” Diretór ESJ Olocasa, Ercio Soares Ruas, hateten, ba Agência TATOLI iha ninia knaar fatin, segunda ne’e.

Profesór ida mate iha tinan 2014 no ida fali mate iha tinan 2018, enkuantu Gorvenu seidauk rekruta profesór foun.

“To’o agora seidauk halo rekrutamentu no Governu bandu la simu profesór voluntáriu, maibé ami tenki simu profesór voluntáriu hodi hanorin estudante sira,” nia akresenta.

Notísia relevante: MEJD lansa projetu komunitáriu konstrusaun sala Eskola ESJ Olocasa Viqueque

Ho preokupasaun ne’e, parte eskola hato’o ona pedidu substitui profesór, maibé to’o agora Ministériu Edukasaun Juventude no Desportu (MEJD) seidauk fó resposta ruma.

“To’o agora seidauk iha resposta, tanba ne’e ami husu ministériu atu aselera prosesu substitui profesór,” nia hato’o.

Antes ne’e, Vise-Ministru Edukasaun Juventude no Desportu, António Guterres, hateten, kona-ba menus profesór, daudaun sei iha faze prosesu nian laran.

“Kona-ba menus profesór, daudaun sei prosesu nian laran ne’ebé ita hein de’it tanba buat hotu sei la’o tuir regra no ekipa ministériu mós halo verifikasaun ba profesór voluntáriu sira iha territóriu Timór laran tomak,” nia dehan.

ESJ Olocasa daudaun iha profesór ativu hamutuk na’in-22 no estudante hamutuk 444.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here