Sekertáriu Estadu Komunikasaun Sosiál (SEKOMS), Merício Juvinal dos Reis ‘Akara’. Imajen TATOLI/Francisco Sony

DILI, 14 fevereiru 2022 (TATOLI)–Sekretaria Estadu Komunikasaun Sosiál (SEKOMS) husu ba jornalista sira atu kontinua mantein nafatin prinsípiu fundamentu sira tuir Lei Komunikasaun Sosiál (KomSos), iha ámbitu Eleisaun Prezidensiál períodu 2022-2027.

Sekretáriu Estadu Komunikasaun Sosiál, Merício Juvinal dos Reis ‘Akara’, hateten, iha eventu polítiku boot ne’e, presiza tebes kobertura mídia hodi disemina informasaun ba povu tomak, maibé presiza tau a’as kódigu konduta ba jornalista sira hodi hala’o knaar ho profisionál iha terrenu.

“Nune’e, refere liubá eventu polítiku ba kandidatura iha kampaña Eleisaun Prezidensiál, husu ba maluk jornalista sira atu halo kobertura ne’ebé nafatin tane a’as prinsípiu ba étika jornalizmu nian hodi hatudu imparsialidade, neutru no fahe informasaun ba públiku,” Sekretáriu Estadu dehan liuhosi nota ne’ebé Agência TATOLI asesu, iha segunda ne’e.

Governante ne’e nota mós katak, iha fulan hirak ikus ne’e, intensidade movimentu polítiku iha rai laran sa’e maka’as tebes tanba iha timor-oan hamutuk na’in-16 maka sai kandidatu ba Prezidente Repúblika, ne’ebé disponibiliza no rejista naran iha Sekretariadu Téknika Administrasaun Eleitorál (STAE) no haruka ona ba Tribunál Rekursu hodi fiskaliza legalidade, nune’e bele partisipa ba prosesu Eleisaun Prezidensiál.

Notísia relevante:  Seidauk prenxe rekezitu, Tribunál Rekursu la simu kandidatu Luis Tilman

Haree no tetu dinámika polítika nasionál ne’ebé mak la’o daudaun, Sekretáriu Estadu husu ba jornalista sira hodi asegura no mantein nafatin prinsípiu fundamentu tuir Lei KomSos, bazeia ba artigu 4 kona-ba dever komunikasaun sosiál, alinea c katak, labele halo referénsia ho diskriminasaun kona-ba rasa, rejiaun, seksu, moras konviksaun polítika no kondisaun sosiál.

“Nu’udar Sekretráriu Estadu Komunikasaun Sosiál hakarak hato’o katak papél jornalista sira maka sai fatór determinante ba prosesu demokratizasaun no dezenvolvimentu nasionál, hodi kria unidade no paz, estabilidade nasaun nia futuru. Nune’e, iha situasaun agora presiza promove Peace Journalism,” Akara apela.

Enkuantu, artigu 20 alinea d, halo profisaun ho independénsia no izensaun, maibé tenki hadook-an hodi fó sai notísia ka opiniaun tuir interese polítiku ka ekonómiku sira maka haruka.

“Husu ba jornalista sira, presiza simu no fahe informasaun ho onestu no bazeia ba data no faktu sira iha terrenu. Husu atu jornalista sira presiza hato’o informasaun ne’ebé kredível no evita dizinformasaun ba públiku, nune’e labele hamosu situasaun inserteza. ,” nia apela.

Enkuantu, Prezidente Repúblika, Francisco Guterres ‘Lú Olo’, liuhosi Dekretu númeru 2/2022 marka ona data Eleisaun Prezidensiál nian iha loron 19 fulan-marsu 2022.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here