CNTI hahú forma ekipa halo prevensaun no kombate traballu infantíl iha RAEOA. Imajen Tatoli/Abílio Elo Nini

OÉ-CUSSE, 14 fevereiru 2022 (TATOLI)- Inspesaun Jerál Traballu (IGT, sigla portugés) hamutuk Komisaun Nasionál Kontra Traballu Infantíl (CNTI, sigla portugés), hahú forma ekipa halo prevensaun no kombate traballu infantíl iha Rejiaun Administrativa Espesiál Oé-Cusse Ambeno (RAEOA).

Ekipa halo prevensaun ne’e serbisu hamutuk ho Organizasaun Internasionál Traballu (ILO, sigla inglés), segunda ne’e fasilita formasaun ba ekipa formadór sira mai hosi Diresaun Rejionál Edukasaun, Juventude no Desportu no Sekretaria Estadu Formasaun Profisionál no Empregu (SEFOPE).

Formasaun ne’e realiza durante loron tolu, hahú hosi segunda to’o kuarta fevereiru semana ne’e, ho ekipa ne’ebé envolve komposta hosi inspetór eskolár sira hamutuk funsionáriu SEFOPE, ne’ebé durante ne’e hala’o serbisu iha RAEOA.

“Agora daudaun, ami halo formasaun ba formadór sira, mai hosi edukasaun inspetór eskolár na’in-sia (9) no funsionáriu SEFOPE iha rejiaun ne’e, ita fasilita sira atubele fahe informasaun ba iha baze kona-ba medida atu kombate halo redusaun ba traballu infantíl, nune’e bele halo eliminasaun iha Oé-Cusse,” Prezidente CNTI, Aniceto Leto Soro, informa ba Agência Tatoli, iha salaun SEFOPE, Oé-Cusse, segunda ne’e.

Materia prinsipál hosi formasaun ne’e kona-ba konseitu labarik envolve iha traballu infantíl, konseitu traballu infantíl nomoos aprezentasaun regulamentu konvensaun tuir lei nasionál no internasionál sira-ne’ebé Estadu Timor-Leste ratifika ona.

Nune’e mós aprezenta medida prátika ne’ebé fasil tuir kultura Timor-Leste nian iha Oé-Cusse, atubele prevene no kombate traballu infantíl iha Oé-Cusse nune’e bele konvense labarik sira asesu ba edukasaun, tanba labarik sira nu’udar autór ba dezenvolvimentu nasaun iha futuru.

Komisaun Nasionál Kontra Traballu Infantíl seidauk iha dadús espesifíka ba Oé-Cusse, maibé dadús globál Timor-Leste nian inklui RAEOA, ne’ebé peskija hosi CNTI públika iha 2016, fó-sai katak totál traballu infantíl iha teritóriu nasionál hamutuk labarik 52,651.

“Ami observa labarik barak iha-ne’e fa’an ikan, bua malus, ita husu sira la eskola, ida-ne’e hanesan mós sira fa’an manu-tolun, dudu karosa iha Dili, ida-ne’e maioria mesak Oé-Cusse oan de’it,” nia fó-sai.

Iha loron 14 maiu 2021 liubá, Komisaun Nasionál Kontra Traballu Infantíl aprezenta ona dokumentu rua kona-ba planu nasionál kontra traballu infantíl ba Sekretaria Estadu Formasaun Profisionál no Empregu (SEFOPE) no Minitériu Koordenadór ba Asuntu Ekonómiku (MKAE), atubele analiza no lori ba Konsellu Ministru aprova, nune’e bele fasialita tékniku sira halo serbisu iha terrenu.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here