CNE munisípiu Bobonaro realiza edukasaun sívika ba membru grupu arte-marsiál no rituál sira iha postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 14 fevereiru 2022 (TATOLI) — Komisaun Nasionál Eleisaun (CNE sigla portugés) realiza edukasaun sívika ho tema “Promove esklaresimentu kona-ba aktu eleitóral no eleisaun ne’ebé reziliente ho Covid-19” ba membru Grupu Arte Marsiál (GAM) no arte rituál sira iha postu administrativu Maliana, munisípiu Bobonaro.

“Ita realiza edukasaun sívika ba grupu arte-marsiál no rituál sira, pelumenus sira bele koñese lala’ok ka krime eleitorál sira-ne’ebé akontese iha eleisaun, hahú hosi kampaña eleitorál, votasaun, tempu kontajen to’o apuramentu iha sentru votasaun sira,” Vise-Prezidente CNE, Domingos Barreto, ko’alia iha Soso, Maliana, segunda ne’e.

Atividade edukasaun sívika ne’ebé realiza durante loron ida-ne’e, CNE fahe matéria kona-ba órgaun administrasaun eleitorál, krime eleitorál ne’ebé prevista Kódigu Penál artigu 229 to’o 243 nune’e membru Grupu arte-marsiál sira bele iha koñesimentu atubele kompriende loloos lala’ok eleisaun nian.

Nia husu ba lideransa no membru grupu arte-marsiál no rituál sira-ne’ebé partisipa iha atividade ne’e rona didi’ak matéria hira-ne’e hodi bele hatutan ba família, komunidade no sosiedade tomak, nune’e bele ezserse sira-nia direitu ho loloos iha ambiente pás no dame.

Reprezentante Prezidente Autoridade munisípiu Bobonaro, Júlio Carvalho Caero, heteten, hanesan siadadaun ne’ebé di’ak, membru grupu arte-marsiál sira iha responsablidade morál atu kontribui ba pás no establidade nune’e eleisaun prezidensiál la’o ho susesu.

“Ohin, CNE konvida imi grupu arte-marsiál sira mai iha-ne’e, atu fó fiar ba imi hodi kontrola iha sosiedade nune’e eleisaun ne’e bele la’o ho di’ak,” nia apela.

Segundu PNTL munisípiu Bobonaro, Asistente Superintendente Fasio de Jesus Lima, enkoraja grupu arte-marsiál uza oportunidade ne’e hodi habelar informasaun importante sira kona-ba eleisaun nian ba família no komunidade.

“Imi tenke nafatin unidade hametin imi-nia amizade hodi kria pás no establidade ba iha prosesu eleisaun ne’ebe ita hotu atu enfrenta ne’e, oinsá ita atu prevene krime iha ita-nia munisípiu ida-ne’e,” nia husu.

Reprezentante membru arte marsiál PHST, Sonia Monis, sente kontente bele hetan oportunidade partisipa edukasaun sívika ne’e, tanba liuhosi atividade ne’e bele eleva koñesimentu kona-ba lala’ók krime eleitorál no eleisaun.

“Ha’u sente edukasaun sívika ida-ne’e importante tebes, tanba ami bele hatene maneira oinsá mak bele vota ho loloos, no ami bele hetan informasaun katak ita iha lei bandu sidadaun sira atu halo krime iha loron elesaun,” nia katak.

Membru GAM ne’ebe partisipa iha edukasaun sívika ne’e mai hosi arte-marsiál Persaudaraan Setia Hati Terate (PSHT), Ikatan Kera Sakti (IKS), Kmanek Oan Rai Klaran (KORK), Kungfu Master, Taekowndo, Karate no seluk tán.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here