Eis Prezidente Repúblika, José Ramos Horta sorumutu ho Prezidenti Repúblika, Francisco Guterres Lú-Olo hodi entrega konvite reuniaun kona-ba demokrasia iha Ázia Pasífiku. Imajen Mídia PR.

DILI, 13 fevereiru 2022 (TATOLI)— Organizasaun Popular Muller Timor-Leste (OPMT), Domingu ne’e, realiza konferénsia Nasionál ba dala-IV hodi deside apoia ba kandidatura Francisco Guterres Lú Olo, enkuantu militante partidu FRETILIN hamutuk-232 iha suku Triloka-Baucau deside fiar ka apoia kandidatura José Ramos Horta ba Prezidente Republika períodu 2022-2027.

“IV Konferénsia Nasionál OPMT, ho kbiit hosi estatutu OPMT no dever atu haforsa disiplina instititusionál, deside fó apoiu totál no inkondisionál ba kandidatu Francisco Guterres Lú Olo ba Prezidente Repúblika 2022-2027”, Prezidente Meza Konferénsia OPMT, Guilhermina Ribeiro, hateten liuhosi nota imprensa ne’ebé Agência TATOLI simu iha domingu ne’e.

Tanba ne’e atu garante susesu ba re-kandidatura husi Francisco Guterres Lú Olo, maka iha konferénsia nasionál ne’e, OPMT orienta ba membru hotu-hotu OPMT atu hala’o de’it atividade ne’ebé halo parte kampaña hosi ekipa susesu no kandidatu Francisco Guterres Lú Olo no tuir programa partidu FRETILIN nian.

Alende ne’e, orienta mós bá membru idaidak OPMT atu dada tama, pelu menus ema na’in-rua tan ba OPMT ka FRETILIN to’o 17 marsu 2022, atu nune’e hasa e númeru votante a-favór kandidatu Lú Olo atu manán iha ronde dahuluk eleisaun prezidensiál, ne’ebé realiza iha 19 marsu 2022.

Desizaun ne’e OPMT hasai bazeia ba Rezolusaun númeru 5/11- I3 fevereiru/2022, IV Konferénsia Nasional OPMT, hafoin haree estatutu partidu FRETELIN, artigu 90, alinea (a) define OPMT nu’udar organizasaun-de-masa partidu nian no feto FRETILIN nian ne’ebé estrutura-an demokrátikamente atu promove igualdade entre feto no mane iha área polítika, ekonómika, kulturál, sosiál no familiár.

Alínea (b) hatuur katak OPMT iha autonomia organizativa no finanseira, ho respeitu ba estatutu, deklarasaun prinsípiu, manuál no programa polítiku FRETILIN, no alinea (c) OPMT iha liberdade asaun no iha estatutu no regulamentu rasik, ho respeitu ba mós orientasaun polítika jerál hatún husi órgaub kompetente FRETILIN.

“Nune’e ho dever tomak atu haktuir orientasaun husi órgaun superiór partidu ne’ebé fó-sai ona hanesan, deklarasaun públika husi Sekretáriu-Jerál partidu FRETILIN, Mari Alkatiri, ne’ebé fó apoiu tomak ba re-kandidatura Francisco Guterres Lú Olo ba Prezidente Repúblika 2022-2027 iha 16 janeiru 2022. Rezolusaun husi Komisaun Polítika Nasional FRETILIN ne’ebé haforsa deklarasaun husi Sekretáriu-Jerál partidu FRETILIN iha 28 janeiru 2022”, Prezidente OMPT ne’e salienta.

Militante FRETILIN fiar Horta

Militante hosi partidu polítiku Frente Revolusionária Timor-Leste Independente (FRETILIN) hamutuk nain-232 iha suku Triloka, postu Baucau Villa, munisipiu Baucau deside hamutuk partidu Kongressu Nasionál Rekonstrusaun Timor-Leste (CNRT, sigla portugés) hodi apoia Ramos Horta ba Prezidente Repúblika 2022-2027.

“Ha’u ho família hamutuk hakarak fila fó apoia ba Aman nasaun Maun boot Xanana Gusmão tanba ami fiar katak Maun boot Xanana Gusmão mak rekoñese ami rezisténsia sira,” Joselina Adriana da Costa Soares hateten iha aldeia Aubaka, Suku Triloka, domingu ne’e.

Militante afilladu ba CNRT iha Suku Triloka, Domingu (13/02). Imajen TATOLI/Natalino Belo

Iha fatin koordenador partidu CNRT, suku Triloka-Baucau, Mario Amaral, hateten agradese ba militante afilladu tanba reforsa tan CNRT no fi’ar iha elisaun mai sei aumenta militante iha suku ne’e.

“Husu boot ba maromak manán iha eleisaun mai, sé karik ita hotu mai ho fuan ho laran fó apoia partidu CNRT entaun ita fó neon ho laran ba Maun boot Xanana Gusmão,” Mario hateten.

Mario husu ba estrutura partidu CNRT tomak atu esforsu nafatin serbisu hamutuk atu lori José Ramos Horta manán iha eleisaun prezidensíal 2022. 

Entretantu, Vise Prezidente Konsellu Diretiva Nasionál CNRT, munisípiu Baucau, António da Costa ‘Malu-Derok Masin’ hateten, militante sira tenke loke matan ba atubele iha dezenvolvimentu ba povu.

Nune’e, Veteranu Derok-Masin husu militante sira atu apoia CNRT atu fila ba ukun tanba lider másimu Kay-Rala Xanana Gusmão no kandidatura José Ramos Horta mak bele lori morisa di’ak ba povu.

“Ita respeita malu la’ós tauk malu, tanba koalia politika laiha limitasaun, sala dehan sala kuandu laiha kapasidade tenke kritika,” Derok Masin akresenta.

Jornalista: Antónia Gusmão/Natalino Belo

Editór      :  Florêncio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here