Padre Pároku Ai-mutin, Imanuel Lelo Tatolok, hamutuk ho madre no sarani sira kuda ai-oan, iha aldeia Lisbutak, suku Manleuana, sábadu (12/02). Imajen TATOLI/Francisco Sony

DILI, 12 fevereiru 2022 (TATOLI)–Padre Pároku Ai-mutin, Emanuel Lelo Talok CMF, hamutuk ho madre no sarani Pároku Ai-mutin inklui komunidade aldeia Lesibutak, suku Manuleuana, postu Dom Aleixo, munisípiu Dili, iha sábadu ne’e, kuda ai-oan 702, iha Manleuana.

Padre Paroku Ai-mutin, Imanuel Lelo Tatolok. Imajen TATOLI/Francisco Sony

“Ohin ita mai halo atividade kuda ai-oan hamutuk ho komunidade no sarani hosi kapela Aidik-laran iha área aldeia Lisbutak hodi proteje ambiente hosi rai halai no rai monu,” Padre Pároku Ai-Mutin hateten hafoin ramata kuda ai-oan ho sarani sira, iha suku Manleuna, sábadu ne’e.

Notísia relevante: AAA Dom Bosco kuda ai-oan rihun 500 iha suku Manleuana

Madre no sarani sira kuda ai-oan, iha aldeia Lisbutak, suku Manleuana, sábadu (12/02). Imajen TATOLI/Francisco Sony

Tuir Padre ne’e, inisiativa kuda ai-oan nu’udar desizaun hosi Arkidioseze Dili, tanba aleinde hanesan sarani, rona misa liuhosi sebrasaun eukaristia, tenke mós fó prioridade ba ekolojia, nune’e bele proteje ambiente hosi risku dezastre naturál sira.

“Ai-oan sira ne’ebé ohin kuda ho tipu tolu hanesan Ai-nimba, Hali no Ai-kakeu. Atividade ne’e sei kontinua atu prezerva ambiente,” nia akresenta.

Iha fatin hanesan, Abitante aldeia Lisbutak, Agosto da Silva, apresia no kontente ho atividade ne’e.

“Ami sente kontente tanba ho atividade ne’e bele proteje ambiente hosi perigu nia laran no ami prontu kontribui karik atividade ne’e  kontinua. Antes ne’e, ami kuda has no derok hamutuk 27,” nia dehan.

Jornalista : Natalino Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here