Grupu Amigo JB F'Litik halo konferénsia imprensa hodi deklara apoiu José Ramos Horta ba kandidatura Prezidente Repúblika períodu 2022-2027, iha sede nasionál Hudi-laran, sábadu (12/02). Imajen TATOLI/Francisco Sony

DILI, 12 fevereiru 2022 (TATOLI)–Grupu Amigu Juventude Badinas Funu Litik ka Amigu JB F’Litik, ne’ebé kompostu hosi joven, dosente no inan-aman hosi munisípiu 12 inklui Rejiaun Administrativa Oé-cusse Ambeno (RAEOA), deklara fó apoiu ba kandidatu Prezidente Repúblika (PR) José Ramos Horta, ba Eleisaun Prezidensiál iha loron 19 marsu tinan ne’e.

Responsável másimu Grupu Amigu JB F’Litik, Carolino de Oliveira, afirma posizaun hodi fó apoiu tomak ba Horta, ne’ebé hetan mós apoiu hosi Xanana Gusmão, tanba konsidera líder rua ne’e mak iha kapasidade atu hatúr filafali Konstituisaun.

Responsável másimu Grupu Amigu JB F’ Litik, Carolino de Oliveira. Imajen TATOLI/Francisco Sony

“Ami konsidera hahú kedan tinan 2018 to’o ohin loron, ita moris iha inserteza nia-laran, iha ámbitu polítiku, ekonómiku, kultura no sosiál, nu’udar konsikuénsia polítika ne’ebé naruk no ramata ho prinsípiu Estadu Direitu Demokrátiku ho la respeitu valór demokrasia nian, ne’ebé konsekuénsia hosi situasaun ne’e hamosu aspeitu negativu ba vida sidadaun hotu iha Timór laran tomak. Hosi konsekuénsia ne’e mak ami iha kompromisu atu apoiu líder na’in-rua, ne’ebé iha kapasidade hadi’a rai ne’e,” Reprezentante grupu, deklara liuhosi konferénsia imprensa, ne’ebé hala’o iha sede nasionál, Hudi-laran, sábadu ne’e.

Notísia relevante: Kandidatu Ramos Horta rejista ona iha Tribunál Rekursu

Nune’e, grupu ne’e husu ba povu Timor-Leste atu fó apoiu ba José Ramos Horta, hodi halo dezisaun bazeia ba Konstitusaun no iha tempu hanesan husu kandidatu ne’e karik povu fó fiar, tenke hadi’a reputasaun Timor-Leste iha mundu.

Grupu Amigo JB F’Litik halo konferénsia imprensa hodi deklara apoiu José Ramos Horta ba kandidatura Prezidente Repúblika períodu 2022-2027, iha sede nasionál Hudi-laran, sábadu (12/02). Imajen TATOLI/Francisco Sony

Aleinde ne’e, grupu ne’e apoiu mós Líder nasionál, Xanana Gusmão, hola parte mós iha estrutura Governu.

“Ami-nia apoiu la to’o iha ne’e, maibé ami sei apoiu nafatin ba Maun boot Xanana Gusmão ba Primeiru-Ministru,” Carolino de Oliveira, afirma.

Iha fatin hanesan, Reprezentante grupu hanesan, Afonso Ximenes, konsidera José Ramos Horta no Xanana Gusmão, mak iha kapasidade lidera Timor-Leste.

“Ha’u husu de’it, karik líder na’in-rua ne’e maka ukun fali, tenke fó prioridade loke empregu, nune’e joven sira bele asesu ba merkadu traballu, tanba empregu sai problema iha Timór, haree ba joven barak maka daudaun hili ba serbisu iha rai-li’ur,” nia dehan.

Iha loron 23 janeiru 2022, Partidu Congresso Nacional de Reconstrução de Timor (CNRT) realiza konferénsia nasionál hodi deside apoia kandidatu PR José Ramos Horta, kompete iha Eleisaun Prezidensiál períodu 2022-2027, ho kondisaun tenke kumpre rekezitu ne’ebé partidu estabelese ona.

Nune’e, iha loron 27 janeiru, Horta ofisiálmente rejista ona kandidatura iha Tribunál Rekursu, atu kompete iha Eleisaun Prezidensiál.

Antes ne’e, hafoin restaurasaun independénsia, José Ramos Horta eleitu nu’udar Prezidente Repúblika daruak ba períodu 2007-2012 hosi Independente.

Jornalista : Natalino Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here