Bibi Rusa hadau malu bee iha illa Jaco. Imajen TATOLI/Jogerjo Guterres

DILI, 11 fevereiru 2022 (TATOLI)—Sekretáriu Estadu Ambiente (SEA) liuhosi Diresaun Nasionál Biodiversidade komprometidu sei proteje no konserva ai-horis no animál protejidu ne’ebé ameasadu atu lakon iha Timor-Leste, liuhosi programa in-situ no ex-situ.

“Programa in-situ mak sei konserva ai-horis no animál protejidu sira iha sira-nia fatin naturál rasik, enkuantu programa ex-situ mak ita sei lori sai animál sira sai hosi sira-nia fatin, bainhira fatin ne’ebé sira hela laiha ona protesaun tanba atividade umanu. Ita kria fatin ida lori sira no tau ba fatin ne’ebé ita kria atu tau-matan no bele prezeva, nune’e labele lakon,” Diretór Nasionál Biodiversidade, Rui dos Reis Pires, hateten ba Agência TATOLI, iha ninia knaar fatin, Bebora, Dili, sesta ne’e.

Notísia relevante: Timor-Leste Tenke Mantein Proteje Animal Protejidu

Animál no ai-horis sira ne’ebé presiza proteje no halo konsevasaun mak hanesan lafaek, manu loriku, kakatua, meda, laku, bibi-rusa, manu kakoak no seluk tan, enkuantu ai-horis mak hanesan ai-parapa, ai-kameli no seluk tan.

“Ba konservasaun ex-situ ninian, iha fatin rua mak hanesan iha Sentru Crocodilo Hera no daudaun ita halo hela estudu atu estabelese tinan oin iha Lagoa Ediri iha postu Administrativu Maubara, munisípiu Liquiçá. Daudaun ita halo hela ezersísiu hamutuk ho parseiru no asosiaun sira hodi prepara fatin Lagoa Weleles iha Fatuberliu, Manufahi atu sai fatin in-situ ba Lafaek no mós ba ai-horis no animál protejidu sira,” nia akresenta.

Nune’e, ba in-situ iha Manufahi, aleinde halo protesaun no konservasaun ba rekursu biodiversidade, iha fatin ne’e sei promove mós hanesan fatin edukasaun hanesan formasaun, peskiza no fatin ba distinasaun turístika.

“Aleinde ita proteje, fa’an mós ninia beleza atu atrai ita-nia turista lokál no internasionál hodi fó rendimentu ba komunidade lokál,” Diretór ne’e dehan.

Kona-ba ex-situ, daudaun ne’e parte diresaun iha hanoin uluk proteje animál protejidu hosi atividade kasa ilegál sira, maibé ba oin fatin ba ex-situ ninian sei halo espesífiku sai hanesan jardín zoolójiku hodi akumula animál protejidu sira hodi prezerva nune’e labele lakon.

Nune’e, maneira ne’ebé parte Diresaun Nasionál Biodiversidade halo hodi proteje biodiversidade iha Timor-Leste mak kolabora hamutuk ho Polísia Nasionál Timor-Leste (PNTL) hodi halo sosializasaun ba komunidade, kona-ba proteje ai-horis no animál protejidu, ne’ebé Governu bandu, no mós serbisu hamutuk ho Programa Nasaun Unida ba Dezenvilvimentu (PNUD) hodi halo tara-bandu iiha suku foho Ai-lico, Hato-udo, munisípiu Ainaro.

“Ida-ne’e sai oportunidade importante atu iha diskusaun ho komunidade lokál, liuliu ba joven no estudante sira atu prevene destruisaun biodiversidade iha Timor-Leste no importánsia dezenvolvimentu sustentável,” Dirijente ne’e tenik.

Haree ba atividade kasa ilegál animál no ai-horis ne’ebé kontinua, Diretór nasionál Biodiversidade apela ba komunidade atu evita estraga ai-horis no animál protejidu sira ne’ebé hanesan orijinalidade Timór nian.

“Ha’u husu ba komunidade hotu proteje ita-nia biodiversidade, tanba iha tinan 2021 sidadaun ida konsege tama prizaun tanba nia halo exportasaun ba animál protejidu ne’ebé Governu bandu ona,” nia informa.

Parseiru sira ne’ebé daudaun serbisu hamutuk Diresaun Nasionál Biodiversidade atu prezerva no proteje ai-horis no animál no protejidu sira mak hanesan Permakultura Timor-Leste (PERMATIL), Asosiasaun AMKTL, no Hametin Agrikultura Timor-Leste (HASATIL).

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here