Komandante PNTL Munisípiu Covalima, Superintendente Basílio de Jesus. Imajen Tatoli/Celestina Teles.

COVALIMA, 11 Fevreiru 2022 (TATOLI)–Polisia Nasionál Timor-Leste (PNTL) Munisípiu Covalima bazea ba grafíku identifika kazu krime aas iha suku Tashilin, postu administrativu Zumalai, munisípiu Covalima.

“Atu redus krime iha Covalima, ita halo aproximasaun liuhosi Igreja ema hotu sai interresadu partisipa iha seguransa hanesan sai nesesidade ida ba ema hotu nia moris. Ha’u fiar ho ha’u-nia métodu ida-ne’e, ita sei redus krime iha covalima. Ha’u foti grafiku krime ne’ebé aas liu iha postu administrativu Zumalai,” Komandante PNTL Covalima, Superintendente Basilio de Jesus informa ba Agência Tatoli iha nia knaar fatin, Santa Rosa, sesta ne’e.

PNTL identifika krime ne’ebé aas iha munisípiu Covalima hanesan iha postu administrativu Zumalai, iha suku Tashilin, aldeia Galitas, Kulu-Oan, Bora-Ikun ne’ebé sai primeiru klasifikasaun tanba sempre halo aktu asaltu malu to’o rezulta oho malu.

Iha fatin hirak ne’e, iha tinan hirak liu ba oho mós Membru PNTL Saudozu Teki Dias no foin lalais iha fulan dezembru nia laran ne’e, oho tan universitáriu na’in-ida.

Nune’e, atu halo prevensaun ba asaun hirak ne’e, komandu PNTL Covalima orienta ona Ofisiál polísia komunitária (OPS), tun nafatin tenta hakbesik an ba komunidade sira halo aproximasaun, eduka joven sira ba asaun ne’ebé oan sira halo.

Aleinde ne’e komandu PNTL ko’alia ona ho pároku sira bainhira, hafoin misa loron domingu fó sai mensajen ba sarani sira kona-ba prevensaun konflitu, hodi hakribit asaun violénsia tanba ema la hanoin bainhira nia halo krime nia sente buat ida normál, nune’e sempre halo asaun krime ikus mai  goza nia ukun an iha prizaun.

“Ha’u aproveita oportunidade bainhira hafoin misa pároku fó biban mai ha’u hodi hato’o mensajen hodi halo prevensaun konflitu, nune’e bele redús númeru krime ne’ebé aas ka halakon krime,” nia dehan.

Krime akontese tanba mai hosi joven sira ataka malu no oho malu ne’e kuaze mai hosi grupu artemarsiál tanba falta sensibilizasaun ba lei, edukasaun no morál hosi família hodi kontribui ba krime.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here