Ferik no katuas-sira forma hela iha BNCTL oin hodi simu subsídiu, tersa (29/12/20). Imajen Tatoli/António Gonçalves.

COVALIMA, 11 Fevreiru 2022 (TATOLI)–Diretór Ministériu Solidariedade Sosiál no Inkluzaun (MSSI) interinu Covalima, Ildefonso da Costa Amarál, hateten MSSI Covalima finaliza ona pagamentu subsídiu ba idozús no invalidéz faze daruak tinan 2021 iha Covalima konklui ona.

Notísia Relevante: Pagamentu idozu faze daruak besik remata, tinan 2022 hahú ho $50

“Pagamentu subsídiu idozu no invalidéz faze daruak iha tinan 2021, bazea ba kalendáriu hosi BNCTL maske ita finaliza ona, maibé pagamentu kontinua nafatin tanba idozú sira-ne’ebé mate ona família kontinua trata sira-nia dokumentu,” Ildefonso da Costa Amarál hateten ba Agência Tatoli iha nia knaar fatin, Suai Loro, sesta ne’e.

Durante hala’o pagamentu ba idozú no invalidéz, MSSI mós simu reklamasaun hosi benefisíariu sira-ne’ebé MSSI suspende provizóriu konta bankaria pagamentu ba idozú no invalidéz la foti osan tinan ida-rua, hafoin simu reklamasaun Centru Solidariedade Sosiál (CSS) haruka karta ba Institutu Nasionál Seguransa Sosiál (INSS) hodi loke konta bankária.

Aleinde mós simu reklamasaun hosi idozú no invalidés bainhira naran iha ona sistema maibé osan laiha ho razaun katak funsionáriu hosi banku halo pagamentu movél tanba banku la halo re-store dadus iha baze dadus.

“Ami mós simu reklamasaun hosi idozús no invalidéz balun mós balun naran ida, maibé osan la tama tanba banku la re-store sira naran iha data baze tanba ekipa ne’ebé halo pagamentu movél iha postu administrative,” nia dehan.

Dadus hosi MSSI Covalima durante atendimentu ba benefisíariu ne’ebé suspende maibé reativa ona hamutuk na’in-25 kompostu hosi feto 16 no mane sia (9).

Atendimentu ba benefisíariu ne’ebé mate hamutuk 134 kompostu hosi feto 70 no mane 64, ne’ebé mai hosi postu administrativu sira hanesan postu administrativu Zumalai 55 ho feto 27 no mane 28, Fohorem iha na’in-rua (2), Fatumea na’in-neen (6) ho mane haat (4) no feto na’in-rua rua (2), Fatululik tolu (3), Suai 29 ho feto 17 no mane 12, Tilomar 26 ho feto 11 no mane 15, Maucatar 13 ho feto feto ualu (8) no mane lima (5).

Kandidatura benefisiariu foun ne’ebé haruka ona ba nasionál hamutuk 488 no hosi númeru ne’e kompostu hosi feto 290 no mane 198.

MSSI regista idozú no invalidéz iha munisípiu Covalima hamutuk 1129 ho nia orsamentu hamutuk $1,103,220.00 ne’ebé kompostu hosi postu administrativu Fatululik ho idozú no invalidéz 222 ho nia orsamentu $ 39,960.00, Fatumea rejista idozú no invalidés 477 ho orsamentu $85,860.00, Fohorem iha idozu no invalidez hamutuk 517 ho osan hamutuk $93,060.00.

Iha psotu administrative Maucatar rejista idozú no invalidéz hamutuk 909 ho orsamentu  $163,620.00, Suai Vila iha totál idozú no invalidéz hamutuk 1672 ho orsamentu $300,960.00, Tilomar rejista idozú no invalidéz hamutuk 730 ho orsamentu $131,400.00 no iha postu administrativu Zumalai rejistu idozú no invalidéz hamutuk 1602 ho orsamentu $288,360.00.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here