Osan Dolar Amérika. Imajen/Espesiál

DILI, 11 fevereiru 2022 (TATOLI)–Tinan fiskál 2022 mak hanesan tinan dahuluk ba implementasaun orsamentu bazeia ba programa atu forne sekusu detalladu hosi kada atividade.

“Orsamentu pur programa la hanesan ho orsamentu pur item ka orsamentu konvensionál, orsamentu pur programa deskreve no fornese kustu detalladu hosi kada atividade ka programa ne’ebé mak sei implementa ho ninia orsamentu alokadu. Programa ida sei iha objetivu ida, inklui bele iha atividade oioin hodi alkansa objetivu. Ezemplu, rezultadu esperadu hosi programa ne’ebé propoin deskreve kompletamente, hamutuk ho nia rekursu nesesáriu, matéria prima, ekipamentu no kustu pesoál,” refere nota ne’ebé Agência TATOLI asesu, kinta ne’e.

Notísia relevante: Governu estabelese regra ezekusaun OJE 2022

Totál atividade ka programa konstitui orsamentu pur programa, tanba ne’e, bainhira haree orsamentu pur programa, fasil ba ema ida atubele haree atividade ne’ebé sei implementa, nia kustu no rezultadu.

“Justifikasaun prinsipál ida hodi muda hosi orsamentu pur item ba orsamentu pur programa mak orsamentu pur item foku liu ba detalla no input sira. Dokumentasaun orsamentu pur item dalabarak, ho pájina ne’ebé kontein tabela sira ne’ebé esplika input sira ba kada entidade orsamentu,” nota hosi Ministériu Finansa esplika.

Iha sorin seluk, sistema orsamentu pur programa dezeña hodi muda foku hosi ‘input’ ba iha ‘output’ ka ‘programa’, ne’ebé liña ministériu sira mak sei fornese serbisu no rezultadu alvu hosi serbisu hirak ne’e, inklui relatóriu kona-ba rezultadu hirak ne’e.

Iha enkuadramentu serbisu, akuntabilidade ba uzu rekursu Governu ka kontribuinte nia osan selu impostu separadu, ne’ebé permite Governu sei akuntavel liután hodi aloka orsamentu ne’ebé própriu ba liña ministériu sira hodi alkansa rezultadu no liña ministériu sira mós sei akuntável liután hodi alkansa rezultadu hirak ne’e.

Istória orsamentu pur programa iha Timor-Leste

Iha tinan 2015 nu’udar faze dahuluk hahú orsamentu pur programa iha Timor-Leste, aleinde ne’e iha tinan 2015 to’o 2019, Governu kontinua uza klasifikasaun ekonómiku.

Enkuantu, tinan 2020 VIII Governu Konstitusionál aprezenta no implementa ba dahuluk Orsamentu Jerál Estadu (OJE) iha forma programátiku.

Iha OJE 2022, Governu halo rasionalizasaun hodi redús númeru programa hosi 145 ba iha 45, ne’ebé Governu sei implementa programas 45.

Programa ho orsamentu boot liu mak Boa Governasaun no Jestaun Institusionál ho orsamentu alokadu kuaze millaun $317,3 ka 16,3%, tuir kedan ho rograma Igualdade Jeneru no Inkluzaun Sosiál ho orsamentu alokadu $233,3 ka 12%, Estrada no Ponte mak programa ne’ebé okupa terseiru lugar ho totál orsamentu liuhosi millaun $202,2 ka 10,4%.

Programa sira seluk ne’ebé ho orsamentu alokadu boot inklui Saúde millaun $107,45 ka 5,53%, Edukasaun no Formasaun millaun $107,33 ka 5,52%, no Eletrisidade ho totál orsamentu alokadu millaun $101,73 ka 5,23%.

Husi 10 maior programa reprezenta kuaze 75% hosi totál orsamentu, ho programa lima reprezenta kuaze 51%.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here