Vise-Ministru Edukasaun Juventude no Desportu (MEJD), António Guterres, halo vizita ba espasu ESTV Rabina Lacluta, sesta (11/02). Imajen TATOLi/Vitirino Lopes da Costa

VIQUEQUE, 11 fevereiru 2022 (TATOLI)—Vise-Ministru Edukasaun Juventude no Desportu (MEJD), António Guterres, informa, Eskola Sekundáriu Tékniku Vokasionál (ESTV) Ravina Lacluta, munisípiu Viqueque sei hahú faze konstrusaun iha marsu 2022 tanba durante ne’e laiha edifísiu própriu.

“Durante ne’e Eskola Ravina okupa de’it Eskola Ensinu Báziku Sentrál 06 Lacluta,” Vise-Ministru informa ba Agência TATOLI, hafoin vizita ba eskola ne’ebé ESTV Ravina Lacluta okupa, sesta ne’e.

Orsamentu ba konstrusaun eskola hamutuk $347.806,68, ba sala neen, eskritóriu ida no sentina ida, ne’ebé prevee kedan iha tinan 2021, maibé prosesu kleur, nune’e iha tinan 2022 foin realiza.

“Prosesu konkursu ita finaliza ona no empreza manan-na’in, Lufiamor unipesoal LDA, mós asina ona kontratu iha semana kotuk liubá, agora ita hein prosesu konstrusaun,” nia akresenta.

Notísia relevante: MEJD lansa projetu komunitáriu konstrusaun sala Eskola ESJ Olocasa Viqueque

Iha fatin hanesan, Koordenadór ESTV Ravina, Rosito Soares Morais, hateten eskola ne’e harii iha tinan 2018 no durante ne’e okupa sala iha eskola seluk hosi hala’o prosesu aprendizajen.

“Ami-nia difikuldade maka laiha edifísiu própriu ida ba ami, nune’e ami uza ensinu báziku nia fatin, bainhira sira sai ami uza fali aula hodi hala’o prosesu aprendizajen,” nia dehan.

Nune’e, Koordenadór eskola agradese ba Governu ne’ebé iha ona inisiativa hodi hahú konstrusaun eskola.

ESTV Ravina Lacluta iha departamentu produsaun Agararia, ho totál estudante hamutuk na’in-126 no profesor hamutuk na’in-14.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here