Sekertáriu Jerál Partidu FRETILIN, Mari Alkatiri. Imajen Tatoli/Francisco Sony.

DILI, 11 fevereiru 2022 (TATOLI)—Sekretáriu Jerál Partidu Fretilin, Mari Alkatiri, hateten kandidatu partidu Fretilin ba Prezidente Repúblika iha eleisaun prezidensiál ne’e na’in-ida de’it mak Francisco Guterres ‘Lú-Olo’ mesak no laiha tan kandidatu seluk.

Notísia Relevante: Alkatiri asina rezolusaun, rekandidatura Lú Olo irrevogável

“Ita tenke distingi instituisaun iha dixiplina no valór prinsípiu, vida kultura rasik no ema ne’e buat seluk. Ha’u ko’alia daudaun tanba agora ho eleisaun prezidensiál ne’e iha konfuzaun barak balun apela votu ho konsiénsia, tanba ne’e ema hosi parte instituisaun ida nune’e kandidatu Fretilin nian ida de’it laiha rua ka tolu. Kandidatu PR hosi Partidu Fretilin mak kandidatu Francisco Guterres Lú Olo mesak,” Mari Alkatiri afirma, bainhira halo abertura ba konferénsia nasionál OPMT ba dal-haat iha Salaun Katedral, sesta ne’e.

OPMT tenke hatene ida-ne’e katak OPMT masa organizasaun Fretilin nian hatutan luta prinsípiu sira.

Antes ne’e, iha kinta (27/01/2022), liuhosi konferénsia imprensa iha sede Comite Central Fretilin (CCF) Comoro, Sekretáriu Jerál Partidu Frente Revolucionária de Timor-Leste Independente (FRETILIN), Marí Alkatiri, hateten kona-ba kandidatu Prezidente Repúblika (PR) hosi partidu atu kompete iha eleisaun, la presiza liuhosi konferénsia nasionál tanba estatutu partidu fó dalan.

“FRETILIN nia estatutu klaru, Prezidente partidu mak primeiru kandidatu ba Prezidente Repúblika, tanba ne’e la presiza konferénsia nasionál,” Alkatiri hateten.

Sekretáriu Jerál hato’o lia hirak ne’e hodi hatan ba preokupasaun públiku ne’ebé kestiona kandidatura atuál Prezidente Partidu FRETELIN, Francisco Guterres ‘Lú Olo’, ba Prezidente Repúblika períodu 2022-2027, sein liu konferénsia nasionál.

Tuir Alkatiri, la’ós la gosta ho kandidatu seluk, maibé Lú Olo iha vizaun inkluziva durante sai hanesan Xefe Estadu no hakarak kontinua ho programa sira atu hametin Estadu, nune’e bele kontribui ba dezenvolvimentu sustentável.

Antes ne’e, Francisco Guterres ‘Lú Olo’ ofisialmente deklara ona ninia kandidatura Prezidente Repúblika períodu 2022-2017 iha munisípiu Ermera, katak sei kandida-an ba kompete iha eleisaun prezidensiál iha marsu 2022.

Bazea ba estatutu Partidu FRETILIN, iha artigu 83 kona-ba kargu polítiku, mensiona katak Prezidente Partidu hanesan kandidatu FRETILIN ba kargu Prezidente Repúblika no Sekretáriu Jerál hanesan kandidatu ba Primeiru-Ministru.

Estatutu ne’e ,ensiona mós katak, bainhira Prezidente no Sekretáriu Jerál la disponível ba funsaun rua ne’e mak sei aprezenta ba Komité Sentrál FRETILIN atu indika membru seluk para ezerse kargu ne’e.

Hafoin restaurasaun independénsia iha 20 maiu 2002, Francisco Guterres ‘Lú Olo’ eleitu hanesan Prezidente Repúblika ba períodu 2017 to’o 2022.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here