Comoro Child and Youth Center (CCYC), sesta (11/02) ne’e atribui sertifikadu ba joven 96. Imajen/Espesiál.

DILI, 11 fevereiru 2022 (TATOLI)—Comoro Child and Youth Center (CCYC), sesta (11/02) ne’e atribui sertifikadu ba joven 96 ne’ebé finaliza ona sira-nia formasaun ba periódu 2021, iha programa Inglés, Komputadór, Portugués no Programa Live Skill Basic Education (LSBE).

“Atividade ba ohin loron nian distribui sertifikadu ba formandu hamutuk 96 ne’ebé durante ne’e sira tuir formasaun loloos ne’e fulan tolu, maibé prezudika ho rezolusaun ne’ebé Governu hasai iha periódu 2021, entaun ohin sira foin finaliza sira-nia formasaun,” Jestór Programa Comoro Child and Youth Center (CCYC), Délio Mali Lopes, informa ba Agência Tatoli, hafoin atribui sertifikadu ba formandu sira iha Salaun CCYC, Comoro, Dili, sesta ne’e.

Formasaun ne’ebé eziste iha CCYC ne’e formandu sira-nia formasaun durante fulan tolu (3), maibé realidade ba iha periódu 2021 nian ho akontesimentu ne’ebé iha kuaze sira-nia prosesu aprendizajen la’o to’o fulan lima (5).

“Tanba, dala ruma sira-nia aula la’o semana ida no rua, Governu hasai rezolusaun hodi hapara fali atividade, hafoin ida-ne’e formasaun kontinua la’o mak to’o ohin loron ita-nia formandu sira konsege finaliza ona sira-nia prosesu aprendizajen iha sentru ne’e,” nia dehan.

Nune’e, ho atribui sertifikadu ne’e, CCYC kontinua esforsu hodi enkoraja nafatin formandu sira, karik abilidade ne’ebé sira hetan iha CCYC ne’e seidauk natoon ba sira.

Entaun, oinsá sentru iha poder atu enkoraja nafatin sira, hanesan iha atividade seluk ne’ebé sira la konsege aprende durante fulan hirak nia laran, hodi ida-ne’e oinsá bele motiva fali sira atu sira bele partisipa nafatin, nune’e sira bele dezenvolve di’ak liután sira-nia abilidade.

Formanda iha área Live Skill Basic Education (LSBE), Leopoldina Barreto, sente kontente no agradese ba CCYC tanba bele fahe ona esperiénsia kona-ba LSBE durante prosesu aprendizajen nia laran.

“Ha’u sente kontente tanba durante prosesu apredizajen buat barak mak ami aprende ona, liuhosi sira-nia esperiénsia ne’ebé sira iha hodi transforma ona mai ami. Maske uitoan maibé ami bele komprende,” nia dehan.

Entretantu, formandu sira ne’ebé ohin simu sertifikadu ne’e hamutuk 96 ne’ebé kompostu hosi área portugués 16, komputadór 21, Inglés 47 no LSBE 12, ne’ebé tuir formasaun durante fulan lima (5) iha CCYC.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here