Prezidente Komisaun Organizadora ba Komemorasaun loron veteranu iha munisípiu Bobonaro, Lúcio Dinis Marques ‘Onsar’. Imajen Tatoli/Sérgio da Cruz.

BOBONARO, 11 fevereiru 2022 (TATOLI) – Munisípiu Bobonaro sei halo komemorasaun ba loron nasionál Veteranu ne’ebé sei realiza iha loron 3 marsu ho atividade lima.

Prezidente Komisaun Organizandora Komemorasaun Loron Veteranu, Lúcio  Dinis Marques ‘Onsar” fó-sai katak, serimónia loron istóriku ne’e munisípiu Bobonaro sei komemora ho atividade lima ne’ebé sei realiza iha kampu futeból Maliana, hahú hosi loron 1 to’o 3 fulan-marsu tinan ne’e.

“Ami halo ona enkontru ho autoridade munisípiu no instituisaun sira hotu iha loron haat liubá, forma ona komisaun idak-idak hodi hasa’e ona proposta ba atividade sira- ne’e. Ho ida-ne’e mak ita trasa ona planu sei realiza atividade mak hanesan futeból no voleiból, semináriu, drum band, misa agradesimentu no ikus mak serimónia ofisiál hasa’e bandeira nasionál,” nia informa ba Agência Tatoli, iha kna’ar-fatin, Maliana, sesta ne’e.

Sekuénsia hosi komemorasaun loron istóriku ne’e, dahuluk hahu ho atividade desportiva, sei akumula joven sira iha postu administrativu sira nune’e bele kria pás no establidade hodi fó valór no dignifika eroi sira-nia luta.

Nune’e mós atividade misa agaradesimentu no kari ai-funan iha osuáriu Maliana sei realiza iha loron 1 marsu, hodi presta omenajen ba eroi pátria sira-ne’ebé fó sira-nia kontribuisaun no dedikasaun tomak hodi hodi harii Repúblika Demokrátika Timor-Leste (RDTL).

Atividade seminináriu ne’e realiza iha loron 2 fulan-marsu, sei partisipa hosi veteranu no komabatente sira hotu atu konta istória luta pasada nian dezde 1975 to’o 1999.

Atividade hasa’e bandeira ho parada militár sei komanda hosi FALINTIL-Forsa Defeza Timor-Leste (F-FDTL) postu Tunubibi no Polísia Nasionál Timor-Leste (PNTL) munisípiu Bobonaro, Seguransa Sivíl, no Bombeiru sira.

Hafoin serimónia hasa’e Bandeira, estudante sira husi Koléjiu Infate de Sagres Maliana, sei demostra sira-nia kreatividade liuhosi animasaun Drum Band hodi anima entididade no komunidade sira-ne’ebé partisipa iha atividade ne’e.

Totál kombatente ne’ebé partisipa iha serimónia ne’e hamutuk 180 kompostu husi postu administrativu Atabae na’in-25, Balibo 25, Lolotoe 30, Bobonaro 40, Maliana 30 no Cailaco 30.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here