Prezidente Autoridade Munisípiu (PAM) Baucau, Olívio 'Bou-Lesa' Freitas. Imajen Tatoli /Natalino Belo.

BAUCAU, 11 fevereiru 2022 (TATOLI) – Autoridade Administrasaun Munisipál Baucau sei koordena ho Komisaun Nasionál Eleisaun (CNE, sigla portugés) atu realiza paktu unidade nasionál relasiona ho kampaña ba eleisaun prezidensiál períodu 2022-2027.

Prezidente Autoridade Munisipál (PAM) Baucau, Olívio ‘Bou Lesa’ Freitas, hateten, inisiativa CNE nian atu realiza paktu unidade nasionál ne’e importante tebes nune’e períodu kampaña to’o data eleisaun la’o ho susesu.

“Agora administrasaun no CNE prepara atu halo paktu unidade nasionál liuhosi tradisaun, ha’u bolu ona lia-na’in sira hosi postu administrativu neen, tanba ita hakarak kampaña no eleisaun la’o ho susesu iba Baucau,” PAM Baucau hateten iha ninia kna’ar-fatin, Vila Nova, sesta ne’e.

Objetivu hosi paktu unidade nasionál mak atu hameten pás no estabilidade iha Baucau nune’e bainhira kampaña no eleisaun prezidensiál sidadaun hotuhotu la’o hakmatek no bele hili Prezidente Repúblika ida-ne’ebé ideál ba Timor-Leste.

Tuir planu paktu unidade nasionál sei realiza antes kampaña prezidensiál ne’ebé sei envolve responsável partidu polítiku sira iha Baucau, arte-marsiál, sosiedade sivíl, veteranu, igereja no lia-na’in hosi postu administrativu neen reprezenta lulik munisípiu Baucau nian.

Diretór CNE Baucau, Esmeraldo Damião Belo, hateten, daudaun ne’e prepara ona maibe kona-ba data realizasaun sei hein desizaun hosi CNE nasionál.

Jornalista         : Natalino Belo

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here