Diretór Nasionál Empregu Exteriór SEFOPE, Filomeno Soares. Imajen TATOLI/Egas Cristóvão

DILI, 10 favereiru 2022 (TATOLI)—Traballadór timor-oan balun ne’ebé durante ne’e serbisu iha Austrália, liuhosi Seasonal Worker Programme (SWP), bainhira repatria konsege kontribui ba atividade ekonomia rai-laran.

“Bazeia ba ami-nia peskiza ba merkadu traballu, ita-nia traballadór ne’ebé durante ne’e serbisu iha Austrália no fila mai, iha na’in-10 resin mak halo ona atividade ekonomia hanesan hakiak manu broiler, halo uma hodi fó aluga (kost), prodús tahu no tempe, no seluk tan,” Diretór Nasionál Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, informa ba Agência TATOLI, iha salaun Senai, Bocora, kinta ne’e.

Notísia relevante: Traballadór timor-oan na’in-300 iha Austrália sai hosi sistema

Aleinde ne’e, iha traballadór ida hosi programa hanesan, konsege prodús kafé u’ut hodi fa’an iha Ermera no Dili no balun halo exportasaun ba Japaun, Austrália, Nova Zelándia, Alemaña no Inglatera.

“Ida-ne’e hatudu katak traballadór sira ne’ebé bá serbisu iha Austrália, bainhira fila mai hakarak kontribui ba ekonomia nasaun. Fundu ne’ebé sira uza hala’o atividade ne’e mai hosi sira rasik, ne’ebé konsege halibur bainhira serbisu iha Austrália,” nia akresenta.

Tuir Diretór ne’e, inisiativa hirak ne’e bele lori impaktu pozitivu tanba bele influénsia maluk seluk hodi bele kapasita-an liután, nune’e ba timor-oan seluk ne’ebé hetan oportunidade liuhosi SWP, bainhira fila mak seidauk iha hanoin ruma atu kontribui ba ekonomia nasaun, SEFOPE ho kolaborasaun Programa Nasaun Unida ba Dezenvolvimentu (UNDP, sigla inglés) sei identifika atu tuir workshop hodi fó ideia negósiu, nune’e sira mós bele kontribui ba ekonomia.

“Ida-ne’e ita-nia responsabilidade, tanba traballadór timor-oan ne’ebé hetan oportunidade ba serbisu iha Austrália, fila mai kuaze 1.000, maibé foin oituan mak bele dehan susesu,” nia tenik.

Enkuantu, traballadór timor-oan ne’ebé daudaun ne’e sei serbisu iha Austrália hamutuk 800-resin, maibé hosi némeru ne’e, iha 300-resin mak halai ses hosi sistema.

“Sira ne’ebé ses hosi sistema  tanba situasaun mak obriga no tanba COVID-19, maibé ita sei buka dalan, nune’e bele filafali ba sistema no  bele seguru,” Diretór dehan.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here