TDD. Imajen Tatoli /Dok

DILI, 10 fevereiru 2022 (TATOLI)— Tribunál Disritál Dili (TDD), kinta ne’e, hala’o julgamentu ba arguida TJS ne’ebé komete desobediénsia ba Dekretu-Lei 23/2009, 5 agustu kona-ba rejime infrasaun administrativa kontra ekonomia no seguransa alimentár.

Arguida TJS ne’e komete violasaun regra sanitária tanba iha tinan 2019 loke restaurante-ida iha área vila-verde, postu administrasaun Vera-Cruz, munisípiu Dili, maibé la ho ijiene.

Nune’e Ministériu Publiku promove aguida ho krime desobediénsia ne’ebe previstu iha artigu 244 hosi Kódigu Penál Timor-Leste.

“Iha duni funsionáriu Autoridade Inspesaun no Fiskalizasaun Atividade Ekonómika no Sanitária (AIFAESA) ne’ebé momentu iha tinan 2019, halo inspesaun ba ha’u nia fatin no husu atu suspende provizóriu ha’u nia atividade tanba restaurante la ijiene, maibé  ha’u nia parte lakohi hadi’a fatin tanba fatin  ka rai  ne’e Estadu nian no ha’u husik kontinua  hala’o atividade,”  Arguida TJS deklara iha sala audénsia julgamentu TDD, kinta ne’e.

Razaun nia kontinua atividade restaurante, Tanba arguida ne’e dehan la hatene lei no prosesu kazu ne’e mai to’o Tribunál.

“Ha’u hafodak bainhira kazu ne’e AIFAESA lori mai iha tribunal, maibé la buat ida tanba ida ne’e ha’u hanoin katak ita hotu tenke kumpre,” nia akresenta.

Iha biban hanesan, sasin Idonia Sanches nuudar funsionáriu iha Deparatamentu Operasaun-AIFAESA mós fó sasin ba Triunál katak iha momentu ne’e sira halo inspesaun ba restaurante ida iha área Vila-Verde iha 2019, hosi inspesaun ne’e ekipa deteta katak fatin ne’ebé hala’o inpesaun ne’e halo atividade ekonomia ne’ebé la tama kriteiru tanba laiha ijiene.

“Iha momentu ne’eba, ami notifika restaurante na’in hodi suspende ni’an atividade provizóriu ho prazu  loron sanulu. Nune’e na’in ba restaurante bele hadi’a tiha nia fatin maka foin halo fali atividade, maibé arguida la kumpre,” nia afirma.

Bainhira, Ekipa AIFAESA tuun fali ba halo inspesaun daruak iha arguida nia restaurante kontinua halo nia atividade.

“Ami deside fó tan notifikasaun daruk ho prazu loron 90. maibé senora ne’e la kumpre no ami halo relatóriu submete ba ami nian parte jurídiku ho Kordenadór Jerál atu foti medida hasoru senora ne’e,” sasin ne’e deklara.

Entertantu, Defensór Públiku ba arguida TJS, Sergio Quintas husu ba tribunál atu tetu didi’ak subtánsia kazu ne’ebé arguida komete tanba halo atividade ho bazeia ba nesesidade uma laran ne’ebé obriga.

Alende ne’e, Ministériu Públiku ne’ebé reprezenta hosi Prokuradór Renato Bernahak husu ba Tribunál liuliu ba Juís prosesu atu tetu didi’ak ba hakalok arguida nian tanba nia hanesan ema ne’ebé buka moris.

Hafoin rona tiha parte hotu, Tribunál deside adia julgamentu ne’e ba loron 25 fevereiru 2022, hodi rona leitura desizaun final.

Audénsia julgamentu ne’e prezide hosi juís singulár Argentinho Luisa no Ministériu Públiku reprezeta hosi Prokuradór Renato Bernahak no arguida hetan asisténsia legál hosi Defensor Públiku Sergio Quintas.

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here