Conselho de Imprensa, I.P lansa livru Planu Estratéjiku períodu 2022-2026 ne’ebé hala’o iha salaun Conselho de Imprensa, Quintal Boot, Dili, kinta (10/02). Imajen Tatoli/Francisco Sony.

DILI, 10 fevereiru 2022 (TATOLI)—Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, hateten liuhosi planu estratéjiku mak bele promove no orienta pensamentu nian ba dezenvolvimentu instituisaun Conselho de Imprensa (CI) atu la’o tuir.

Sekertáriu Estadu Komunikasaun Sosiál, Merício Juvinal dos Reis ‘Akara’. Imajen TATOLI/Francisco Sony.

“Hakarak promove demokrásia iha ita-nia rain no mídia nia pilar importante ba prosesu demokrásia ne’ebé halo kooperasaun kontinua sai parseiru estratéjiku. Tanba planu estratéjiku mak sai matadalan atu la’o tuir tanba kada tinan ita bele ajusta programa anuál ho planu estratéjiku refere, nune’e ha’u hakarak fó apoiu tomak ba Conselho de Imprensa (CI) ba ideia hodi kria planu estratéjiku 2022-2026,” Merício Juvinal dos Reis ‘Akara’ hateten ba jornalista sira hafoin halo lanasamentu ba livru planu estratéjiku períodu 2022-2026, iha salaun Conselho de Imprensa, Quintal Boot, Dili, kinta ne’e.

Governante ne’e hatutan, instituisaun ida presiza iha planu estratéjiku nune’e atu orienta hodi dezenvole instituisaun iha tinan ida no tinan lima nia laran.  

Prezidente Interinu Conselho de Imprensa (CI), Expedito Dias Ximenes, hateten prosesu elaborasaun planu estratéjiku ba tinan lima nia-laran ne’e involve partisipasaun direjente no ofisiál hosi CI hala’o duranate loron lima hosi 13-17 dezembru 2021 iha Maubara-Liquiça.

Prezidente Interinu Konsellu Imprensa, Expedito Loro Dias Ximenes. Imajen Tatoli/Francisco Sony

Hosi prosesu elaborasaun ne’e CI rona mós parseiru SEKOMS, mídia na’in sira hanesan jornál Independente, Asosiasaun Jornalista Timor-Leste (AJTL) no Timor-Leste Press Union (TLPU), no prosesu elaborasaun fasilita hosi tékniku profísionál polítiku no planeamentu finansa Centro Nasionál Chega (CNC).

Nune’e, nia dehan, planu estratéjiku ne’e ho nia vizaun ho sosiedade ida livre respeita pluralizmu no liberdade imprensa.

Planu estratéjiku CI nian atu alkansa ho efetivu tuir tempu determinadu ne’ebé mak presiza tebes iha kapasidade instituisionál ida-ne’ebé mak ba haree rekursu umanu ho finanseiru, nune’e Governu ne’ebé tutela ba SEKOMS hodi reforsa órgaun independente no regularidade

Diretór Ezekutivu Konsellu Imprensa, Rigoberto Monteiro. Imajen Tatoli/Francisco Sony

Diretór Ezekutivu Conselho de Imprensa, Rigoberto Monteiro, hateten CI iha atividade 46 ne’ebé mak sei halo iha tinan lima (5) mai mak objetivu jerál no espesífiku ho nia alvu jornalista no mídia sira no alvu seluk mak garante independénsia no fó informasaun balansu ba públiku.

Diretór ne’e esplika tan, objetivu espesífiku haat (4) ne’ebé mak CI identifika mak kapasidade kompeténsia téknika, dezenvolve no apoiu asosiasaun jornalista atu eleva kompeténsia téknika, auto-regulasaun rejistu ba mídia, karteira profísionál no ikus liu mak knaar apoiu jestaun institusionál mídia.

Durante semana ida-nia laran Conselho de Imprensa (CI) gasta $10.000 hodi prodús livru planu estratéjiku 2022-2026.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here