Ministru Transporte no Komunikasaun, José Agustinho da Silva. Imajen Tatoli/Egas Cristóvão

DILI, 10 fevereiru 2022 (TATOLI)–Governu liuhosi Ministériu Transporte no Komunikasaun (MTK) halo hela esforsu hodi estabelese akordu servisu aéreu ho país Malázia, nune’e bele iha voo ligasaun entre país rua.

“Desde ha’u-nia mandatu, hahú kedan akordu servisu aéreu liuhosi diskusaun ho Ministériu Transporte Malázia, maibé natureza nasaun ida ba nasaun seluk  diferente, entaun prosesu ne’e la’o to’o agora. Maibé iha ona informasaun bainhira ha’u fila hosi viajen bá Dubai, Konsuladu iha ne’ebá hato’o katak dokumentu haruka ona mai Autoridade Aviasaun Sivil Timor-Leste atu haree fali, nune’e bainhira formaliza no tama faze finál, ita bele inisia,” Ministru Transporte no Komunikasaun, José Agustinho da Silva, informa, hafoin hasoru Primeiru-Ministru, Taur Matan Ruak, foin lalais ne’e, iha Rezidénsia Farol.

Notísia relevante: Aviaun QANTAS sei garante konetividade aérea Timor-Leste no Austrália

Molok realiza voo komersiál entre país rua, tenki iha akordu servisu aéreu, hanesan Timor-Leste ho Indonézia bele tanba iha ona akordu servisu aéreu, maski Parlamentu Nasionál Timor-Leste seidauk ratifika, maibé durante ne’e la’o hela.

“Nasaun sira ne’ebé Timor-Leste iha ona akordu servisu aéreu mak ita bele realiza voo komersiál. Maibé rute Dili-Malázia ne’e ita-nia akordu servisu aéreu seidauk iha, entaun úniku alternativa mak voo ho karater charter, tanba ita laiha baze legál. Maski nune’e, país sira ne’ebé iha ona akordu, durante pandemia voo komersiál hotu ita kansela, maibé daudaun normaliza ona tanba ita seidauk iha aviaun própriu no jere hela ema-nia aviaun,” Ministru akresenta.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here