Prosesu reabilitasaun Eskola EBF Hum-Boe, munisípiu Ermera. Imajen/Espesiál

DILI, 10 fevereiru 2022 (TATOLI)—Eskola Ensinu Báziku Filiál (EBF) Hum-Boe, munisípiu Ermera, hetan ona apoiu materiál hosi parseiru internasionál, hodi reabilita sala tolu ne’ebé hetan estragu tanba dezastre naturál ne’ebé akontese foin lalais ne’e.

Tuir Diretór Nasionál Asaun Sosiál Eskolár, Joaquim Martins, inisiativa ne’e hodi bele konklui prosesu reabilitasaun, tanba Ministériu Edukasaun Juventude no Desportu (MEJD) halo kooperasaun di’ak ho parseiru dezenvolvimentu sira hodi hetan apoiu materiál emerjénsia.

“Apoiu ne’ebé ita hetan hanesan materiál, la’ós hosi Ministériu Edukasaun Juventude no Desportu, maibé hosi parseiru internasionál hanesan UNICEF no PLAN,” Diretór informa ba Agência TATOLI, iha ninia knaar fatin, Villa verde, kinta ne’e.

Notísia relevante: MEJD halo abertura ba reabilitasaun no konstrusaun eskola iha territóriu TL

Materiál emerjénsia ne’ebé UNICEF apoiu maka kalen hamutuk unidade 2.000 inklui kalen kaber metru 400 no hosi PLAN apoiu pregu xapeo, pregu 10cm no pregu 2cm hamutuk kilograma 300, ne’ebé kada pregu kilograma 100.

“Ho materiál hosi parseiru maka Eskola EBF Hum-Boe konsege konklui ona reabilitasaun sala tolu ne’ebé hetan estragu tanba ai-hun boot ida monu tesik edifísiu eskola hodi estraga sala sorin balun, maibé agora daudaun estudante sira kontinua hahú fali sira-nia prosesu aprendizajen hanesan baibain,” nia akresenta.

Nune’e, nu’udar diresaun ne’ebé servisu tau-matan hadi’a kondisaun eskola ho tipu emerjénsia, Diretór ne’e apresia ho apoiu hosi parseiru sira.

Aleinde ne’e, Diresaun Nasionál Asaun Sosiál Eskolár fó tan apoiu materiál ba Eskola EBF iha Fatu-Gau Letefoho, munisípiu Ermera, hanesan kalen unidade 150 no pregu.

“Eskola Fatu-Gau ne’e ninia problema la’os tanba dezastre naturál, maibé tanba kondisaun eskola kleur liu ona, harii dezde tempu Indonézia. Tanba ne’e parte eskola submete proposta hodi husu reabilitasaun no oras ne’e diresaun apoiu ona materiál ba eskola ne’e,” nia akresenta.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here