Ekipa konjuta hala’o ezekusaun mandadu TDD hodi hamamuk komunidade ne’ebé okupa rai rai privadu iha área Ai-mutin, kinta 10/2/2022. Imajen Tatoli/Antonio Dasiparu

DILI, 10 fevereiru 2022 (TATOLI— Ekipa Konjunta kompostu hosi Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL) no Jestaun Merkadu Munisípiu Dili, kinta ne’e, ezekuta mandadu Tribunál Distritál Dili (TDD) hodi hasai obrigatóriu komunidade ne’ebé okupa rai iha aldeia Terus Nanis, suku Comoro, postu administrativu Dom Aleixo, munisípiu Dili.

Ekipa konjuta ne’e hasai obrigatóriu okupante sira bazeia ba notifikasaun Tribunál ho númeru Nuc, 37/20/CV TDD.

Ekipa konjuta hala’o ezekusaun mandadu TDD hodi hamamuk komunidade ne’ebé okupa rai  privadu iha área Ai-mutin, kinta 10/2/2022. Imajen Tatoli/Antonio Dasiparu

“Iha ezekusaun ida ne’e liuhosi andamentu prosesu normal ho baze ba mandadu Tribunál nune’e parte ofisiál ho seguransa sira atu hasai obrigatóriu okupante sira. Tanba ida ne’e mak desizaun ikus no ita hotu tenke kumpre,” Advogadu Privadu Octávio Cardoso, hateten bainhira akompaña ekipa konjuta hamamuk okupante sira, iha Ai-mutin-Dili, kinta ne’e.

Nia dehan, antes halo ezekusaun mandadu ne’e, Tribunál fó loron 20 atu halo embargu datoluk kontra desizaun tribunál ni’an, maibé prova hirak ne’e TDD indefere.

“Atu ko’alia katak buat hotu ita bele halo, maibé tribunál kuandu indefere katak laiha prova ne’ebé sufisiente hodi konvense tribunál atu anula nia desizaun ba iha prosesu ne’e, ho ida ne’e mak  ita-boot sira haree desizaun to’o ba iha nia rohan no ezekusaun la’o ona,” nia afirma.

Okupante sente triste

Iha biban hanesan, Okupante rai iha Ai-mutin, Julião António Soares, sente triste ho desizaun Tribunál ne’ebé obriga sira sai hosi fatin ne’e tanba la justu no konsidera rai ne’e sira okupa durante tempu naruk nia-laran.

“Ha’u hanesan oan no ha’u hela iha rai ne’e sente desizaun ne’ebé Tribunál fó sai la justu tanba tuir loloos Tribunál tenke buka prova hodi haree didi’ak tanba ami la’ós okupa rai ne’e iha 2006, maibé ha’u moris iha rai ne’e kedan,” nia lamenta.

Ekipa konjuta hala’o ezekusaun mandadu TDD hodi hamamuk komunidade ne’ebé okupa rai rai privadu iha área Ai-mutin, kinta 10/2/2022. Imajen Tatoli/Antonio Dasiparu

Nune’e, nia dehan hanesan okupante sei la kumpre desizaun hodi hamamuk fatin no sei kontinua mantein atu buka lia loos.

“Ami mantein nafatin atu buka lia loos tanba ami la aseita Advogadu Alzira Ximenes deklara katak iha 1997 ami la hela iha rai ne’e. Deklarasaun ne’e la loos tanba ami hela iha ne’e no ami-nia uma fatin uluk iha leten, hafoin muda mai iha ne’e,” nia akresenta.

Entretantu, Tuir observasaun jornalista Agência Tatoli iha tereñu nota katak, ekipa konjuntu hasai ona sasan okupante ba rai nian hosi uma laran hodi tau ona iha estrada ninin iha parte ai-mutin, inklui hasai mós materiál mobiliariu nia hanesan ai, karreta no sasan sira seluk.

Iha prosesu ezekusaun mandadu tribunál ne’e hetan seguransa másimu hosi Polísia Nasionál Timor Leste no FALINTIL-Forsa Defeza Timor-Leste (F-FDTL. Enkuantu, rai ne’ebé okupante sira okupa ne’e ho nia medida metru kuadradu 21.000.

Jornalista : Nelia Fernandes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here