CNE RAEOA hahù kapasita ofisiál na'in-88 hodi hala’o supervizaun iha eleisaun prezidensiál. Imajen Tatoli/Abílio Elo Nini.

OÉ-CUSSE, 10 fevereiru 2022 (TATOLI) – Komisaun Nasionál Eleisaun (CNE, sigla portugés), iha Rejiaun Administrativa Espesiál Oé-Cusse (RAEOA), kinta ne’e hahú halo formasaun ba ofisiál monitorizasaun na’in-88 hodi superviziona kampaña no eleisaun prezidensiál períodu 2022-2027.

“Agora ami prepara ona fó formasaun ba sira na’in-88, oinsá atu hasa’e sira-nia kapasidade, eleva sira-nia koñesimentu kona-ba papél no kna’ar ne’ebé hala’o durante kampaña no eleisaun nian,” Diretór CNE RAEOA, Tomás Oqui Meta, informa ba Agência Tatoli iha Sikluli, Oé-Cusse.

Nia fó-sai katak, ofisiál hirak-ne’e balu foun no balu tuan, maibé presiza fó nafatin informasaun nune’e sira bele hala’o servisu ho di’ak, nune’e bele fó rezultadu di’ak ba iha eleisaun prezidensiál.

“Matéria prinsipál iha formasaun maka, utilizasaun sistema eleisaun prezidensiál, órgaun administrasaun eleitorál nian, papél ofisiál monitorizasaun liga ho kampaña eleitorál, keixa no reklamasaun inklui krime eleitorál nomoos formuláriu sira, ne’ebé sira atu prienxe, bainhira sira hala’o serbisu iha terrenu,” nia katak.

Nia hatutan, kona-ba fasilidade Komisaun Nasionál Eleisaun iha Oé-Cusse, daudaun ne’e enfrenta problema kona-ba transporte.

“Iha-ne’e ami iha de’it karreta avansa ida, maibé labele halo movimentu to’o iha baze, motorizada iha tolu (3) de’it, entaun ofisiál sira lori rasik sira-nia transporte hodi halo serbisu iha kampaña eleisaun tinan ne’e, problema mós liña komunikasaun, maibé nu’udar responsável órgaun eleitorál iha Oé-Cusse, ami deklara katak festa demokrasia ne’e tenke la’o di’ak iha rejiaun ne’e,” nia subliña.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here