Prezidente Board Fundasaun CAUCUS, Amélia Maria da Costa Exposto. Imajen Tatoli/Sérgio da Cruz.

BOBONARO, 10 fevereiru 2022 (TATOLI) – Fundasaun CAUCAUS liderada Amélia Maria da Costa Exposto, oferese formasaun ba feto sira iha munisípiu Bobonaro.

Prezidente Board Fundasaun CAUCUS, Amélia Maria da Costa Exposto, fó-sai katak iha tinan ne’e sei esforsu atu luta hodi hasa’e partisipasaun no envolvimentu feto iha vida polítika atubele iha kapasidade no kompeténsia foti desizaun hanesan ho mane.

Nia afirma, razaun esforsu luta ba feto nia direitu iha vida polítika ne’e tanba bazea ba peskiza ne’ebé halo durante ne’e identifika partisipasaun feto Timor-Leste iha vida polítika sei mínimu.

“Ami sei nafatin tún ba munisípiu hotu-hotu atu enkoraja feto sira atu partisipa iha vida polítika, liuliu iha estrutura partidu polítiku hodi hetan netik valór nune’e ema mane sira bele valoriza ona feto nia partisipasaun. Kuadu iha ona reuniaun partidu polítiku feto mós iha ona kbiit no kapasidade atu ko’alia ho mane,” nia informa ba jornalista sira, iha salaun enkontru Cruz Vermelha Timor-Leste, filiál Bobonaro, kinta ne’e.

Nia haktuir, bazea dadus peskiza hatudu feto Timor-Leste ne’ebé partisipa vida polítika iha Parlamentu Nasíonal atinje ona 40%, membru governu foin 4%, maibé iha lider komunitáriu sira mak sei mínimu liu.

“Ami halo peskiza ida-ne’e atubele ajuda oinsa atu prepara liután feto sira atubele assume responsablidade iha pozisaun xave sira,” nia akresenta.

Nune’e Fundasaun CAUCUS hahu halo formasaun ba feto potensiál sira iha munisípiu Bobonaro, kona-ba promove lideransa ne’ebé ideál no demokrátiku ba futuru.

“Formasaun ne’e mós oinsá atu hametin feto sira-nia konfiansa no partisipasaun ba iha estrutura partidu polítiku sira nune’e iha eleisaun tuir mai bele kompete ona ho mane sira iha eleisaun,” nia katak.

Reprezentante Feto Bobonaro, Laurentina de Jesus, konsidera formasaun ne’e importante tebes ba feto sira iha área urbana no rurál.

“Ami durante ne’e laiha informasaun kona-ba ida-ne’e, ne’e duni kualkér atu foti desizaun depende liu ba desizaun hosi ami-nia parseiru tanba ne’e ha’u sente kontente tebes bele partisipa iha formasaun ne’e, formasaun ne’e bele motiva ami no labele ta’uk atu sai lideransa partidu polítiku,” nia hateten.

Feto potensiál munisípiu Bobonaro ne’ebé partisipa iha atividade formasaun durante loron rua ne’e hamutuk 20-resin, mai hosi reprezentante feto partidu Congresso Nacional de Reconstrução de Timorense (CNRT), Frente Revolusionária Timor-Leste Independente (FRETILIN), Partidu Demokrátiku (PD), Kmanek Haburas Unidade Nasional Timor-Oan (KUNTO) no balun hosi organizasaun sosiedade sivíl sira.

Jornalista         : Sérgio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here