Vise-Ministru Administrasaun Estatál, Lino de Jesus Torrezão, hala’o diálogu ho xefe suku ho nia estrutura hosi postu administrativu hotu iha munisípiu Covalima. Imajen Tatoli/Celestina Teles.

COVALIMA, 10 fevereiru 2022 (TATOLI)–Xefe suku Dato Tolu, postu administrativu Fohorem, munisípiu Covalima, João Resi, preokupa no husu ba Governu atu hamatan ba kompañia sira liuliu kompañia sira-ne’ebé implementa projetu iha suku maibé la konsidera xefe suku nia autoridade.

“Se bele informa ba ministériu sira, tanba kompañia balun implementa projetu iha suku dala ruma ami laiha kuñesimentu. Hanesan iha ha’u-nia suku la liga ami,” João Resi hato’o preokupasaun ne’e bainhira Vise-Ministru Administrasaun Estatál, Lino de Jesus Torrezão, hala’o diálogu ho xefe suku ho nia estrutura hosi postu administrativu hotu iha munisípiu Covalima, iha salaun Administrasaun Munisípiu Covalima, Kampu Baru, kuarta ne’e.

João preokupa kompañia implementa projetu la konsidera sira maibé bainhira iha implementasaun iha terrenu hetan problema ruma, kompañia na’in sira hahú buka xefe suku atu rezolve problema ne’ebé mak sira enfrenta.

“Kompañia hetan problema buka ona ami xefe suku atu rezolve sira-nia problema, maibé implementa projetu laiha kunesimentu hosi ami. Ami atu ba haree mós dala ruma ami-nia dignidade laiha,” nia dehan.

Xefe suku ne’e husu ba Vise-Ministru Administrasaun Estatal (MAE), Lino de Jesus Torrezão konsidera no presiza haree asuntu ne’e hodi fó hanoin ba Xefe Governu atu tau iha konsiderasaun hodi tetu.

Vise-Ministru Administrasaun Estatal (MAE), Lino de Jesus Torrezão, hateten programa sira ne’ebé mak ONG nasionál no internasionál sira implementa iha suku tenke iha kunesimentu hosi xefi suku.

“Normalmente ONG internasionál hetan kunesimentu hosi Administradór maibé tenke iha kunesementu husi xefe suku sira,” nia dehan.

Tuir Lei Númeru 9/2016, 8 jullu, Lei Suku, suku sira iha funsaun determinante iha prezervasaun identidade kulturál no iha mobilizasaun hosi komunidade lokál atu hala’o esforsu koletivu ba rekonstrusaun nasionál.

Liuhosi funsaun importante sira-ne’ebé refere ona, suku sira iha funsaun determinante mós kona-ba iha mobilizasaun komunidade lokál no iha dalan ba konkretizasaun hosi projetu sira ho interese koletivu, iha prezervasaun ba pás no estabilidade sosiál.

Xefe suku husu MAE altera matadalan programa UKL

Aleinde ne’e, xefe suku ne’e husu ba Ministériu Administrasaun Estatal (MAE) atu altera matadalan implementasaun programa Uma Kbiit Laek  (UKL)  ba família vulneravél ka ema kbiit laek sira.

“Ha’u hato’o kona-ba Programa Nasionál Dezenvolvimentu Suku (PNDS), presiza atu muda matadalan tanba matadalan tenke kondis ho situasaun real iha komunidade nia leet,” nia dehan.

Razaun atu muda matadalan implementasaun ba programa UKL tanba ferik katuas ne’ebé mak laiha oan ne’e sira laiha direitu atu hetan Uma Kbiit Laek (UKL) ne’e viola ema-nia direitu umanu, tanba programa ida-ne’e mós atu hamenus mukit iha Timor-Leste.

Aleinde ne’e sidadaun sira-ne’ebé mak hola mane ka feto iha fatin seluk mak xefe família la muda kartaun eleitorál sira-ne’e mós laiha direitu atu sai hanesan benefisiáriu hodi hetan Uma Kbiit Laek (UKL), tanba ne’e nia sujere ba Governu atu haree matadalan ida-ne’e atu altera.

Xefe Suku Zulo, João Lopes de Carvalho, husu klarifikasaun kona-ba ekipa PNDS atu halo verifikasaun ba família vulneravél sira-ne’ebé mak merese atu hetan UKL.

“Ita-nia komunidade ne’ebé nia inan-aman mate sira laiha família atu ajuda no hamriik nu’udar xefe família kategória kbiit la’ek ka lae. Ami verifika família ida-ne’e fixa família sira mesak halo toos no natar sustenta ba família,” nia ndehan.

Maibé realidade hatudu ekipa jestaun suku tun halo intervein balun katak família ne’ebé nia inan-aman mate moris mesak iha família la merese atu hetan no família ne’ebe moris di’ak ona nia sai benefisiáriu ba UKL.

Vise-Ministru Administrasaun Estatal (MAE), Lino de Jesus Torrezão, hateten matadalan uluk alokasaun orsamentu la haree ba distánsia ka ema ne’ebé moris di’ak maibé agora aloka  orsmentu ne’e igual.

“Atu fó hanoin matadalan ita mak halo, iha buat balun uluk alokasaun orsamentu UKL la haree ba distansia aloka orsamentu iguál, maibé matadalan agora muda aloka orsamentu haree tuir situasaun no kondisaun estrada hanesan ema mate ona iha direitu ka lae. Ita tenke haree no kria kondisaun bazea ba ezijénsia ne’ebé iha,” nia klarifika.

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here