Diretór Autoridade Aduaneira Rejiaun Adminstrativa Espesiál Oé-Cusse Ambeno (RAEOA), José da Costa. Imajen Tatoli/Abilio Elo Nini.

OÉ-CUSSE, 10 fevereiru 2022 (TATOLI) – Autoridade Aduaneira (AA/Alfándega) iha Rejiaun Administrativa Espesiál Oé-Cusse Ambeno (RAEOA) rekolla reseita hahú hosi hosi janeiru to’o dezembru 2021 hamutuk $131,970.13.

“Iha 2021 Alfándega hetan de’it $131,970.13, ida-ne’e hetan hosi sasán importasaun hanesan nesesidade bázika no konstrusaun sivíl maibé oituan de’it tanba konstrusaun projetu laiha, ba esportasaun durante tinan ida laiha, tanba situasaun pandemia COVID-19,” Diretór Alfándega RAEOA, José da Costa, informa ba Agência Tatoli iha Palaban, Oé-Cusse, kinta ne’e.

Tuir nia, situasaun pandemia afeta tebes ba empreza sira atu halo importasaun barak ho tipu saida de’it, tanba durante aplikasaun deklarasaun estadu emerjénsia autoriza sasán semana ida tama dala-ida de’it.

“Ita kompara ho tinan 2019 hetan millaun $2 ba leten, maibé iha pandemia COVID-19 monu, tanba ema latama liuhosi terrestre, só empreza sira iha Oé-Cusse mak hatama sasán,” nia katak.

Nia fó-sai katak, reseita ne’e maioria rekolla iha importasaun nian, maibé espotasaun laiha tanba iha tinan 2021 Timor-Leste enfrenta problema mundiál COVID-19, no sasán importasaun mai liuhosi prosesu naruk, balu liuhosi selu taxa.

“Iha mós sasán tama ilegál, entaun parte seguransa prende hodi selu multa ba Estadu, maibé taxa bootliu mak importasaun ne’ebé tama hosi fronteira Sakato, Oésilo, Pássabe, Nítibe, portu no aeroportu,” nia katak.

Totál funsionáriu ne’ebé hala’o serbisu iha Autoridade Aduaneiru RAEOA hamutuk ema na’in-43, na’in-sia (9) no permanente na’in-34 kontratadu.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here