Kankru susun. Ilustrasaun/Espesiál.

DILI, 10 fevereiru 2022 (TATOLI)— Tuir dadus estatístika hosi Fundasaun ALOLA no Ha’u Hili Atu Kura (HALIKU), iha tinan 2021, rejista pasiente kankru susun hamutuk 27, hosi númeru ne’e nain-rua mak mate.

“Durante tinan 2021, ami rejista moras kankru susun hamutuk 27, hosi númeru ne’e na’in-24 mak iha problema ho moras susun, na’in tolu mak pozitivu kankru susun no na’in-rua mak mate tanba sira mai ho estadium ne’ebé mak grave,” Diretora Ezekutiva Fundasaun ALOLA-HALIKU, Maria Imaculada Guterres, hateten ba Agência TATOLI iha knaar fatin Mascarinhas-Dili, kuarta ne’e,

Notísia relevante:  Númeru kankru susun sei aas iha TL

Iha tinan 2021, HALIKU konsege fó asisténsia ba maluk feto sira ne’ebé sofre kankru susun na’in-25 no daudaun hala’o hela tratamentu, maibé depende ba médiku sira haruka ba rai li’ur atu halo chemotherapy no radiotherapy tanba labele halo rasik terapia iha rai-laran.

HALIKU mós fó apoia ba pasiente kankru susun hanesan osan sosa ai-moruk, sosa hahán no ajuda transporte atu fasilita sira halo tratamentu saúde.

Diretora Ezekutiva ne’e dehan ema ne’ebé mak hetan moras kankru susun ne’e ho idade 18 ba leten no maioria idade 30, nune’e médiku sira mós iha interese atu halo estudu hodi hatene motivu ka fatór saida mak kontribui kankru susun iha Timor-Leste ne’e.

“Agora kankru susun nia laiha kauza, maibé   nia fatór risku kontribui ba hamosu kankru hanesan ema nia estilu de vida no ladun halo ezersísiu, han ai-han la saudavél no hahan laiha nutrisaun, hafoin fuma no hemu tua ida ne’e kontribui,”nia akresenta.

Nune’e, nia husu ba ina-feto sira ne’ebé hetan sintoma kankru susun atubele hakbesik an lalais ba fasilidade saúde hodi halo detesaun sedu tanba da’et ona to’o grave labele salva vida.

Fundasaun ne’e mós husu ba Ministériu Saúde atu sosa ekipamentu reajente atu halo tratamentu pasiente kankru susun iha ne’e hodi hamenus transferénsia pasiente ba rai-li’ur.

“Durante ne’e ita haruka ita-nia pasiente ba halo chemotherapy iha rai li’ur, maibé ita -nia rekursu iha ona di’ak liu investe ba iha atu ita hala’o de’it ona iha ita-nia rai laran,” nia rekomenda.

Notísia relevante:  Sintoma Kankru Susun Feto Barak Sofre Ona 

  HALIKU Fó Asisténsia Ba Inan Feton 115 Ne’ebé Sofre Kankru

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here