UNICEF iha Timor-Leste apoia rádiu movel unidade tolu ba Sekretária Estadu Komunikasaun Sosiál (SEKOMS). Imajen/Mídia SEKOMS.

DILI, 09 fevereiru 2022 (TATOLI)—United Nation Children’s Fund (UNICEF) iha Timor-Leste, kuarta (09/02) ne’e apoia rádiu movel unidade tolu ba Sekretária Estadu Komunikasaun Sosiál (SEKOMS).

Espesiálista Komunikasaun United Nation Children’s Fund (UNICEF) iha Timor-Leste, Rukshan Ratnam, hateten ekipamentu rádiu movel ne’e atu ajuda rádiu komunidade sira kontinua hasa’e konsiénsia iha komunidade nia leet kona-ba rejistu moris iha Timor-Leste.

“Ami-nia asosisaun serbisu hamutuk ho SEKOMS no rádiu komunidade sira iha territóriu laran tomak dezde tinan 2005 to’o ohin loron, ajuda ona lori informasaun ba komunidade sira iha rai laran iha tinan barak nia laran. Ami ajuda sira iha fatin ne’ebé sira moris ba, iha lian ne’ebé mak sira kumprende no hosi ema-ne’ebé mak sira hatene, ne’ebé mak voluntáriu ka serbisu ho rádiu komunidade sira,” Rukshan Ratnam hateten ba jornalista sira, hafoin entrega ekipamentu rádiu movel ba SEKOMS, iha edífisiu Rádiu Metro, Balide, Dili, kuarta ne’e.

Iha tinan barak nia laran, SEKOMS, Rádiu Komunidade sira no UNICEF, hamutuk halo ona serbisu adisionál barak ne’ebé importante ba labarik sira, liu-liu servisu hamutuk ho Ministériu Justisa no Governu Japaun atu hasa’e komunidade sira-nia konsiénsia kona-ba importánsia hosi rejistu moris, ajuda ona inan-aman no kuidadór sira hatene kona-ba importánsia hosi rejistu moris no hetan sira-nia sertidaun moris RDTL.

Rejistu moris mak direitu prinsipál hosi labarik sira, tuir Konvensaun Direitu Labarik, direitu ba identidade ida, nasionalidade no atu hetan sura iha buat hotu.

Tanba, tuir estátistika Governu Timor-Leste, iha 60% de’it hosi labarik sira hotu iha Timor-Leste mak rejista ona no 30% de’it mak iha ona sira-nia sertidaun moris RDTL iha tinan 2016, no ida-ne’e hatudu progresu dezde tempu ne’ebá maibé seidauk to’o tanba sei nunka atinje, to’o tempu bainhira labarik hotu-hotu rejista ona bainhira moris.

Nune’e, rejistu moris ne’e gratuita iha Timor-Leste no ida ne’e inan-aman no kuidadór sira-nia knaar atu rejista sira-nia oan bainhira moris mai no hetan sira-nia identidade ofisiál ida, atu nune’e sira bele hetan sura bainhira Governu ho ninia parseiru hotu halo planu no implementa programa importante sira hanesan protesaun labarik, kuidadu saúde no edukasaun ne’ebé ajuda asegura sira-nia direitu fundamentál sira.

UNICEF iha Timor-Leste apoia rádiu movel unidade tolu ba Sekretária Estadu Komunikasaun Sosiál (SEKOMS). Imajen/Mídia SEKOMS.

“Ha’u husu ba inan-aman no kuidadór sira atu rejista sira-nia oan iha tempu badak no garante sira-nia direitu realizadu no protejidu. Ami mós orgullu atu serbisu hamutuk ho rádiu komunidade sira iha kooperasaun ho SEKOMS, ne’ebé mak hasa’e ona kobertura númeru labarik rejista ona no simu ona sira-nia sertidaun moris RDTL. Ne’e akontese tanba rádiu komunidade sira-nia kontribuisaun liuhosi sira-nia transmisaun, iha stúdiu hosi rádiu komunidade 17 iha munisípiu 13 atu promove mensajen kona-bá rejistu moris iha lian lokál neen (6), hanesan Tetum, Fataluku, Makasa’e, Mambae, Tokodede no Baekenu. Nune’e, mós ho transmisaun rádiu movel iha komunidade ka suku no mós iha merkadu hosi rádiu komunidade Ermera no Viqueque,” nia dehan. \

UNICEF espera katak ho ekipamentu hirak ne’ebé mak entrega on aba SECOMS sei uza hosi rádiu komunidade sira iha territóriu laran tomak, hodi hala’o sira-nia atividade rádiu movel iha suku ka aldeia no mós iha merkadu sira hodi promove rejistu moris.

Alende ne’e, UNICEF agradese ba rádiu komunidade sira, ba sira-nia esforsu hasa’e konsiénsia kona-ba asuntu seluk relasiona ho direitu labarik, inklui liuhosi programa rádiu sira, kona-ba prevensaun COVID-19 no vasinasaun COVID-19 iha lian lokál neen (6).

“Ami husu ita-boot sira nu’udar rádiu komunidade, atu kontinua apoia inisiativa ne’e durante ita-boot sira-nia atividade rádiu movel, nune’e mós kona-bá promosaun nutrisaun loloos ba labarik sira, fase liman, aprendijazem kontinuasaun liuhosi matrikulasaun iha eskola no protesaun ba labarik sira hosi violénsia no abuzu,” nia dehan.

Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, sente kontente no orgullu ba apoia ne’e, tanba UNICEF hanesan parseriu estratégiku ne’ebé mak apoia Governu hosi inisíu to’o agora, espesiálmente kooperasaun di’ak ho SEKOMS.

UNICEF iha Timor-Leste apoia rádiu movel unidade tolu ba Sekretária Estadu Komunikasaun Sosiál (SEKOMS). Imajen/Mídia SEKOMS.

“Durante ne’e sira apoia makaas ba ita-nia rádiu komunidade sira, la’ós de’it ekipamentu maibé sira apoia entermu konteúdu, ne’ebé ha’u sente kontente, tanba kooperasaun nia rezultadu mak ne’e. Ohin, ha’u reprezenta Governu Timor fó apresiasaun ba suporta hotu-hotu hosi UNICEF no espera ita-nia koolaborasaun ne’e bele kontinua ba oin, liu-liu iha área komunikasaun, espesiálmente oinsá apoia rádiu komunidade hodi divulga informasaun ba ita-nia alin no oan sira, tanba ita-nia oan sira mak presiza atensaun, presiza fó informasaun. Nune’e, mós ita-nia inan aman sira presiza hetan informasaun di’ak,” Merício Juvinal dos Reis ‘Akara’ hateten.

Ezemplu, labarik sira moris bele ba rejistu, tanba rejista ne’e direitu inisiál ne’ebé tenke atribui, ne’ebé ida-ne’e mak objetivu hosi kooperasaun durante ne’e, tanba ho meiu sira-ne’e mak bele defende direitu labarik ho di’akliu no iha instituisaun seluk defende direitu labarik tuir sira-nia knar.

“Ha’u kontente, tanba ekipamentu ne’e ho kualidade di’ak, hanesan rádiu movel ita bele lori ba fatin ne’ebé laiha área kobertura, ita bele tau iha merkadu ko’alia ho ita-nia sidadaun sira, hosi ne’e SEKOMS kontente ho ida-ne’e,” Governante ne’e hateten.

Diretór Nasionál Promosaun Dezenvolvimentu Mídia Lokál, José da Costa hateten, ekipamentu ne’ebé UNICEF apoiu mak hanesan rádiu movel ho unidade tolu ne’e kompletu hotu kedas.

“Iha sasán esensiál ba rádiu movel mak transmiter, iha antena no mixer no sasán sira-ne’e kompletu kedas, ne’e sai hanesan mini estasaun ida hanesan sound sistem, laptop no aisi record, ne’e kompletu hotu,” nia informa.

Ho rádiu movel ne’e signifika sai hanesan estasaun kiik-oan ida bainhira sira halo tranzisaun iha área rurál sira.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here