Eskola ESJ 10 Dezembru, Comoro. Imajen TATOLI/Tomé Amado

DILI, 09 fevereiru 2022 (TATOLI)—Reabilitasaun Eskola Ensinu Sekundáriu Jerál (ESJ) 10 Dezembru iha Comoro hahú ona, tanba ne’e uma-kain 24, kompostu hosi profesór no estudante balun, ne’ebé okupa resintu, deklara prontu hamamuk fatin.

“Nu’udar família ne’ebé hela iha resintu eskola, bainhira Governu mai hasai laiha problema, tanba ne’e desizaun tenke kumpre, maibé ita husu de’it atu hetan tratamentu dignu, labele halo diskriminasaun,” Okupante resintu eskola no atuál Diretór Eskola ESJ 10 Dezembru, Domingos Sávio Gusmão, hateten iha resintu eskola, Comoro, kuarta ne’e.

Antes ne’e, iha tinan 2017, Espoza Eis Prezidente Repúblika, Isabel Ferreira, durante nia vizita, hato’o ba okupante sira katak bainhira hasai hosi resintu eskola ho dignu no iha tempu ne’ebá konsege foti mós dadus okupante.

Nune’e, Diretór Eskola konsidera, tempu ona atu Governu hasai komunidade iha resintu eskola hodi aselera prosesu reabilitasaun labele iha impedimentu.

Notísia relevante: Abitante 52 kontinua okupa resintu Eskola ESJ 10 Dezembru Comoro

“Sé mak hela iha área eskola tenke sai hotu atu prosesi bele la’o ho di’ak, tanba programa Governu labele impede. Iha mós juventude no estudante balun mak hela iha área eskola, tanba ne’e liafuan dignu ne’e tenke hanesan, labele halo diskriminasaun, ida-ne’e mak Governu liuhosi Ministériu Edukasaun Juventude no Desportu (MEJD) tenke konsidera,” nia akresenta.

Nune’e mós, Diretór Servisu Edukasaun Dili, Carlito da Silva, otimista katak uma-kain 24 sei koopera ho Estadu atu aselera prosesu dezenvolvimentu.

“Ha’u orgullu no kontente ba ha’u-nia mestre, joven no estudante sira ne’ebé hela iha área Eskola 10 Dezembru nia laran, ho hanoin di’ak sira hakarak koopera ho Estadu atu halo dezenvolvimentu iha eskola. Ita la’ós atu rezolve problema maibé ita tuur hamutuk atu solusiona problema sira ne’ebé akontese iha eskola ne’e tanba reabilitasaun eskola ne’e hahú ona,” nia dehan.

Ho nune’e, Servisu Edukasaun Dili, Diretór Eskola ESJ 10 Dezembru inklui reprezentante komunidade ne’ebé hela iha área eskola forma ona ekipa kiik ida atu buka solusaun ba problema ne’e no sei hasoru mós autoridade lokál inklui Polísia Eskuadra Ai-mutin atu hetan solusaun ruma, hodi bele aprezenta rezultadu sira ne’e ba Prezidente Autoridade munisípiu Dili.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here