Ministru Edukasaun, Juventude no Desportu. Armindo Maia. Imajen TATOLI/Francisco Sony

DILI, 09 fevereiru 2022 (TATOLI)–Ministru Edukasaun Juventude no Desportu (MEJD), Armindo Maia, informa, prosesu pagamentu retroativu ba profesór kontratadu sira sei pendente tanba Komisaun Funsaun Públika (KFP) husu atu halo uluk avaliasaun dezempeñu molok hetan direitu.

“Foin lalais Komisaun Funsaun Públika hasai surat ida hodi husu halo avaliasaun dezempeñu, pur enkuantu halo lai ba kontratadu sira,” Ministru hateten iha Palásiu Governu, kuarta ne’e.

Notísia relevante: Pedidu extensaun ajente administrasaun públika tenke akompaña avaliasaun dezempeñu

Tuir governante ne’e, pagamentu retroativu ba tinan kotuk konsege realiza ona ba funsionáriu sira ne’ebé maka asume kargu xefia, maibé ba tinan ne’e seidauk bele tanba tenke kumpre lai surat hosi KFP nmak foin bele realiza.

Iha sorin seluk, rejista profesór voluntáriu iha territóriu Timor-Leste hamutuk 3.000, ne’ebé iha hela prosesu verifikasaun dadus.

“Munisípiu 11 ramata ona halo verifikasaun dadus, maibé falta Dili maka seidauk, dadus ne’ebé iha fofoun ha’u hanoin cerca de 4.000 maibé haree didi’ak fali 3.000 mak agora iha atu prienxe vaga 975,” nia akresenta.

Nune’e, Ministru kontinua husu ekipa verifikasaun hodi aselera prosesu, nune’e bele hahú loke rekrutamentu.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

2 KOMENTÁRIU

  1. Sujestaun kona-ba manorin voluntáriu sira nian:
    1. Sujere ba MEJD atu hato’o hela KFP katak manorin voluntáriu 3.000 itál purvolta hosi munisípiu 12 inklui RAEO, sebele governu fó kontratu dala ida de’it. Hodi kria fali lei ida laiha tán manorin voluntáriu iha tihan 2023 ba oin (diretór ka sé de’it mak haruk ema ida voluntáriu hanorin entaun ema ida haruka ne’e tenke hetan pena-prizaun).
    2. Sujere ba MEJD ho KFP atu rekruta profesór be atu kompete ba iha vaga 975 ne’e tenki haree mós ba área espesialidade ne’ebé presiza tebes tanesan: L.Portugés, L. Tetun, História. Tanba profesór L. Portugés mesak idade avansadu ona entaun tenke presiza duni manorin foun. Parte seluk hanesan área L. Tetun no História tenkeser tanba manorin sira durante lori dixiplina Tetun no História la’ós área espesializada mak hanorin maibé bazeia ba esperésia de’it. Ida-ne’e importante loos tenke tau atebsaun bá tanba UNTL prodús ona produtu espesialidade Tetun nian be daudaun voluntáriu hela iha eskola sira.
    3. Sujere ba MEJD atu renova kurríkulu: 1. Hatuur dixiplna L. Tetun tama iha ezame nasionál, 2. Dixiplina História tenke hanorin hotu ba estudante sira iha CT no CSH hotu, la’ós ba CSH tanba istória importante ba ema hotu hatene ninia istória rasik tantu nasionál ka internasionál.
    Obrigada!

  2. Atu sujere deit é mellor atende lai sira ne’e bé foin lalais MEJD rekolla ona dadus ne’e no tenki verifika didiak tamba ema balun la’os ba hanorin nian maibé prense hotu kriteiru ne’e. E por enquantu no sei fo fallansu mos estudante iha futuru tamba ema balun la’o tuir regra manorin nian. No mos tenke aselera lalais manorin voluntáriu sira gasta ona sira nia tempu ba hanorin estudante sira durante tinan lima ka neen ba leten. Tuir ha’u nia MEJD mos tenki tau mos prioridade ba parte hirak ne’e, tamba atu dezenvolve nasaun tenki liu manorin sira. Matenek nain ida dehan ha’u la’os médicina, ha’u la’os advogadu, ha’u la’os dentista maibé imi hatene ka lae se forma imi. Ha’u Professór.

HAKEREK NO HATÁN

Please enter your comment!
Please enter your name here