Rekerente hamutuk ho família sobu ona lutu ba rai konstrusaun edifísiu PNTL iha Caicoli, Dili, kinta (12/08/21). Imajen TATOLI/Nelson de Sousa

DILI, 09 fevereiru 2022 (TATOLI)–Governu aprova projetu deliberasaun ida, relasiona ho alterasaun kontratu ba konstrusaun foun Kuartel Jerál Polísia Nasionál Timor-Leste (PNTL).

Projetu deliberasaun ne’e aprezenta hosi Sekretáriu Estadu Protesaun Sivil, Joaquim José Gusmão dos Reis Martins, ne’ebé substitui Vise-Ministru Interiór, António Armindo, iha reuniaun Konsellu Ministru.

“Kontratu ba konstrusaun ne’e asina ona iha loron 26 janeiru 2018, entre Estadu Timor-Leste ho Shanghai Construction Group Co., Ltd, maibé hafoin inísiu ezekusaun kontratu, haree katak projetu ne’e falla no bele afeta seguransa ba konstrusaun. Estudu ne’ebé hala’o ona konklui katak iha nesidade atu halo alterasaun ba projetu atubele reforsa fundasaun,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun Konsellu Ministru, iha Palásiu Governu, kuarta ne’e.

Notísia relevante: Disputa rai konstrusaun edifísiu PNTL, defeza hatama petisaun ba TDD

Antes ne’e, projetu konstrusaun edifísiu PNTL, lansa fatuk dahuluk iha 10 janeiru 2020, ne’ebé implementa hosi empreza internasionál Shanghai Construction Group Co, Ltd (SCG) no konsultór PT. Ciriajasa Cipta Mandiri in JV With JKC Consultan Engineering Unipesoal Lda, ho valór orsamentu $10.177.638,20.

Iha loron 09 fevereiru 2021, uma-kain 11 iha aldeia 01 Sentru ba Unidade, suku Caicoli, munisípiu Dili no Organizasaun Rede ba Rai (RbR), husu ba Governu liuhosi Diresaun Nasionál Terras no Propriedade (DNTP) no PNTL, atu deside didi’ak valór indemnizasaun ba vítima sira ho justu no transparánsia ba públiku.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here