Klibur intelektuál no Juventude RAEOA apoia Armanda Berta ba prezidente repúblika períodu 2022-2027. Imajen Tatoli/Abílio Elo Nini.

OÉ-CUSSE, 09 fevereiru 2022 (TATOLI) – Klibur intelektuál no juventude sira iha Rejiaun Administrativa Espesiál Oé-Cusse Ambeno (RAEOA) apoia kandidatura Armanda Berta do Santos atu sai prezidente repúblika ba períodu 2022-2027.

“Ami deklara apoia totalmente ba kandidatura Armanda Berta do Santos, ami prontu depozita ami-nia konfiansa tomak hodi sai prezidente repúblika ba períodu 2022-2027,” Portavós Klibúr intelektuál no juventude RAEOA, Juventus Elo, deklara liuhosi konferensia imprensa ne’ebé realiza iha bairru Padimau, suku Costa Oé-Cusse, kuarta ne’e

Klibur intelektuál no juventude sira iha Rejiaun Administrativa Espesiál Oé-Cusse Ambeno fó sai razaun prinsipál lima (5).

Dahuluk, kandidatu Armanda Berta do Santos, hanesan inan feto ne’ebé haraik-aan no simples iha asaun moris, no hatene hakuak ema hotu, hodi tau aas interese komún nian no kumpri konstituisaun RDTL nu’udar fonte prinsipál lei nian.

Daruak, Armanda Berta do Santos, inan feto ida-ne’ebé barani, pasiénsia, umildade iha asaun servidora nian, no inan-feton ida-ne’ebé hadomi tebes nia povu simples.

Datoluk, Armanda Berta do Santos, inan-feton ida-ne’ebé moris simples, matenek ne’ebé naton, maibé riku iha domin no kariedade.

Dahaat, Armanda Berta do Santos, inan-feton ida-ne’ebé korijiozu hodi promove igualdade jéneru no inkluzaun, hosi sai inan ba ema hotu, la haree diferensa, ideolojia, relijiaun no étniku.

Ikusliu, tempu to’o ona atu Armanda Berta do Santuo, assume kna’ar nu’udar prezidente repúblika ne’ebé iha filosofia ida katak, pasiénsia hodi rona, no serbí ho domin, inan ida-ne’ebé ezemplár ba nasaun, no inan ba Timor-oan tomak.

Jornalista         : Abílio Elo Nini
Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here