Vise-Ministru Administrasaun Estatál (MAE), Lino de Jesus Torrezão, inaugura Uma Kbiik Laek (UKL) iha suku Lour-Covalima. Imajen/Espesiál.

COVALIMA, 09 fevereiru 2022 (TATOLI)—Governu liuhosi Vise-Ministru Administrasaun Estatál (MAE), Lino de Jesus Torrezão, inaugura Uma Kbiik Laek (UKL) tolu (3) iha suku Lour, aldeia Laegatal, postu administrativu Zumalai, munisípiu Covalima.

“Ha’u mai iha ne’e atu inaugura Uma Kbiit Laek no atu haklaken lian ba benefisiáriu sira katak, kbiit Governu no Estadu nian mak hodi haree nia komunidade sira bele hetan uma ida-ne’ebé mak dignu,” Lino de Jesus Torrezão hato’o liuhosi nia diskursu ne’ebé Agência tatoli asesu, kuarta ne’e.

Governante ne’e hateten, durante tinan rua (2) Orsamentu Jerál Estadu (OJE) Governu foku tau orsamentu ba komunidade nia leet atu haree bee-moos, eletrisidade, estrada, nune’e hodi bele rekupera ekonomia durante 2020-2021, iha implementasau serka sanitária (SS) no konfinamentu obrigatóriu (KO) aloka orsamentu la’ós konsentra iha nasionál mai to’o iha baze.

“Totál uma ne’ebe ha’u sita 1254 no hosi númeru ne’e 60% entega ona, foin atu hahú la’o 25% maibé 10%-15% mak la asesu estrada atu halo movimentasaun hodi transporta materiál konstrusaun atu konklui ona 20%, seidauk konklui 25%.” nia esplika.

VIII Governu konstituisionál nia programa konstrui Uma Kbiit Laek (UKL), tinan ne’e sei konstrui tan uma rihun haat (4.000) bazea ba kritériu manuál PNDS nian katak suku ida uma 10.

Diretór Programa Nasionál Dezenvolvimentu Suku (PNDS) Covalima, Filipe Cardoso esplika, Governu inaugura Uma Kbiik Laek tolu iha suku Lour, aldeia Laegatal, postu administrativu Zumalai ne’e nia orsamentu konstrusaun hamutuk $47.000.

Enkuantu, tuir relatóriu hosi PNDS Covalima hatudu katak implementasaun UKL 90 no hosi númeru ne’e uma 52 taka kalen no pinta ona, balun foin tau sinta jerál ne’ebé ho tipu uma 48 ho kuartu tolu (3), medida 37 kuartu rua (2).

Ekipa Programa Dezenvolvimentu Nasionál Suku konstrui Uma Kbiit Laek (UKL) iha munisípiu Covalima hamutuk unidade 90 ne’ebé implementa iha suku 30 ne’ebé pertense ba postu Administrativu hitu (7) ho totál orsamentu hamutuk $1,491.000.

Administrasaun munisipál Covalima

Administrasaun munisipál Covalima hetan despeza hosi OJE  2022 hamutuk tokon $3,8, aloka tuir liña orsamentu servisu sektoral no sekretariadu administrasaun munisipál nian akumuladu ona kustu ba merenda eskolár, alfabitizasaun, konsesaun eskolár $948.7, no ba projetu reapropriasaun PDIM rihun $353.6.

Covalima hetan alokasaun husi programa PNDS rihun $460 atu finansia atividade fíziku rihun $397.8 ba suku 12 no resta rihun $62, ba kustu operasional.

Alokasaun hosi programa UKL rihun $954.0 hodi finansia aktividade fíziku rihun $918.0 ba suku 18 no despeza operasional rihun $36.

Ba programa PMOHA iha 2022 seidauk hetan alokasaun no ba iha PDIM hetan alokasaun orsamentu rihun $353,6, husi totál ne’e, rihun $424.4 finansia ba projetu reapropriasaun neen.

Notísia Relevante: Tinan 2022: PNDS sei konstrui “Uma Kbiit Laek” 278 iha Covalima

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here