Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (09/02). Imajen TATOLI/Francisco Sony

DILI, 09 fevereiru 2022 (TATOLI)–Governu liuhosi reuniaun ezekutivu aprova Projetu Rezolusaun Governu nian ne’ebé propoin hosi Ministra Negósiu Estranjeiru no Kooperasaun, Adaljiza Albertina Xavier Reis Magno, kona-ba donativu ba reprezentasaun permanente Repúblika Árabe Saaraui Demokrátika.

“Iha Timor-Leste iha reprezentasaun diplomátiku sira, ne’ebé sira-nia povu to’o ohin loron sei luta nafatin ba sira-ninia ukun rasik-an, maski sira hetan ona rezolusaun hosi Organizasaun Nasaun Unida (ONU) atubele iha referendu ba auto determinasaun,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun Konsellu Ministru, iha Palásiu Governu, kuarta ne’e.

Notísia relevante: Governu apoiu $120.000 ba reprezentasaun permanente Repúblika Árabe Saharauí

Portavóz Governu dehan, medida ne’e reforsa lasu istóriku entre país rua, bazeia ba dezeju komún iha luta auto determinasaun nian.

“Iha prinsípiu solidariedade ho povu nia luta ba libertasaun nasionál no direitu ba ninia auto determinasaun no independénsia, prezente iha Konstituisaun Repúblika, ne’ebé iha Rezolusaun Parlamentu Nasionál ba solidariedade no apoiu ba povu Saaraui, no iha faktu Timor-Leste kontribui hosi tinan 2011 ba funsionamentu reprezentasaun permanente iha Dili, liuhosi konsesaun subsídiu anuál hodi hala’o atividade sira iha Timor-Leste no iha rejiaun,” Ministru akresenta.

Antes ne’e, iha loron 10 fevereiru 2021, Governu aprova donativu hamutuk $120.000 ba reprezentasaun permanente ne’e.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here