Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (09/02). Imajen TATOLI/Francisco Sony

DILI, 09 fevereiru 2022 (TATOLI)—Governu liuhosi reuniaun Konsellu Ministru (KM) aprova Projetu Rezolusaun Governu kona-ba planeamentu familiár, ne’ebé aprezenta hosi Ministra Saúde (MS), Odete Freitas Belo.

“Polítika ida-ne’e ho objetivu adapta konseitu planeamentu familiár, ne’ebé integradu no apropriadu kulturalmente ho kontestu Timor-Leste, ho konsiderasaun ba kompromisu polítiku ne’ebé motiva adezaun nasionál ba Planu Asaun Konferénsia Internasionál ba Populasaun no Dezenvolvimentu,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu, kuarta ne’e.

Notísia relevante: Governu Halo Revizaun Polítika Nasionál ba Planeamentu Familiár

Portavóz Governu konsidera, planeamentu familiár importante tebes atu hamenus mortalidade inan ho empoderamentu inan-feton sira, liuhosi asaun akonsellamentu jenétiku no konjugál, informasaun ba métodu no fornesimentu meius kontrasesaun, tratamentu infertilidade, prevensaun moras hosi tranzmisaun seksuál no rastreiu kankru jenitál.

“Métodu planeamentu familiár konstitui mós instrumentu privilejiadu ba defeza saúde inan no oan, prevensaun ba abortu no defeza saúde no kualidade moris família sira nian,” nia akresenta.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here