Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (09/02). Imajen TATOLI/Francisco Sony

DILI, 09 fevereiru 2022 (TATOLI)–Governu liuhosi reuniaun Konsellu Ministru (KM), kuarta ne’e, aprova projetu Dekretu-Lei, ne’ebé aprezenta hosi Ministru Asuntu Kombatente Libertasaun Nasionál, Julio Sarmento da Costa ‘Meta Mali’, ba alterasaun dahitu Dekretu-Lei númeru 15/2008, loron 04 juñu, kona-ba pensaun kombatente no mártir libertasaun nasionál. 

“Projetu Dekretu-Lei ne’e ho objetivu atribui kompeténsia ba Administrasaun Konsellu Kombatente Libertasaun Nasionál hodi aprova regra movimentasaun konta bankária destinada ba depózitu retensaun pensaun kombatente no mártir libersaun nasionál no ba administrasaun no prestasaun konta ba fundu ne’e rasik,” Ministru Prezidénsia Konsellu Ministru, Fidelis Manuel Leite Magalhães, informa, hafoin reuniaun ezekutivu, iha Palásiu Governu.

Alterasaun ne’e atu fó kobertura legál ba jestaun fundu veteranu, tanba iha tinan 2020 liubá veteranu sira hahú halo kontribuisaun, hodi rai osan iha mekanizmu ne’ebé hanaran fundu veteranu, ne’ebé daudaun ne’e montante besik ona millaun $20.

Notísia relevante: Fundu kontributivu veteranu millaun $20-resin iha konta fundu veteranu

“Ho alterasaun ne’e, fó kobertura ba asaun refere, katak konsellu veteranu sira bele halo atuasaun internál no bele halo desizaun hodi deside montante hira mak sei bele kria hodi tau ses iha fundu ne’e, ne’ebé mak sei reinveste filafali ba benefísiu veteranu no sira-nia família,” Ministru esplika.

Investimentu fundu hahú hosi janeiru 2020 to’o agora, ne’ebé kada fulan Ministériu Assuntu Kombatente Libertasaun Nasionál, hanesan ministériu implementadór programa, ko’a osan $30 hosi kada veteranu, hodi depozita iha Banku Nasionál Komérsiu Timor-Leste (BNCTL, sigla portugés).

Nune’e, liuhosi kongresu konsellu nasionál kombatente libertasaun nasionál dahuluk, aprova deliberasaun númeru 01, iha loron 21 dezembru 2019, hodi fó kbiit ba Sekretaria Estadu Asuntu Kombatente no Libertasaun Nasionál (SEAKLN) hodi implementa polítika kriasaun fundu investimentu ba veteranu.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here