Ponte Bulobu, suku Ritabou, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 09 fevereiru 2022 (TATOLI) – Enjeñeiru hosi kompañia Nanayo Unipessoal Lda, Lázaro Olandino, fó-sai katak, iha fulan-ne’e komunidade sira bele uitiliza transporte públiku no privada bele asesu ponte Bulobu, suku Ritabou, postu administrativu Maliana, munisípiu Bobonaro tanba atinje ona 99.8%.

“Agora atinje ona 99,8%, iha fulan ida-ne’e nia laran komunidade bele utiliza ona, tanba agora tama faze nahe aspal, hein aban maran, ami tau aspal halus tán silindru sama tiha liu menutu 30 hanesan karreta no motorizada bele liu ba mai kedas,” nia informa ba Agência Tatoli, iha mota Bulobu, kuarta ne’e.

Projetu ne’e hahú iha inísiu 2018 serbisu hotu la’o ho di’ak, maibé iha 2019 to’o 2020 tanba impaktu hosi pandemia Covid-19 entaun serbisu balun la konsege realiza, tanba regra prevensaun Covid-19 traballadór estrajeiru sira labele dezloka mai Timor-Leste.

Tanba ne’e iha tinan 2021 governu halo tán estensaun kontratu hahú hosi fulan-janeiru to’o juñu, maibé situasaun klima la konsege finaliza no governu deside estende tán fulan-neen to’o dezembru 2021.

Komunidade sira-ne’ebé la’o-ain iha ponte ponte Bulobu, suku Ritabou, postu administrative Maliana, munisípiu Bobonaro. Imajen Tatoli/Sérgio da Cruz.

“Loloos ne’e ami entrega iha fulan-dezembru tinan kotuk, maibé tanba situasaun natureza, udan beibeik ami adia hela de’it to’o agora mak foin tau aspal, hotu tiha bele fasilita kedas komunidade liu ba mai, kona-ba atu inagura ou lae ne’e kestaun obra públiku nian,” nia dehan.

Nia haktuir, dezde inísiu fulan-janeiru ne’e to’o agora komunidade sira-ne’ebé la’o-ain, utiliza ona hodi halo movimentasaun ba mai, liuliu iha tempu udan, maibé sira transporte para de’it iha ponte sorin, hein udan para mak foin bele asesu.

Entretantu komunidade António de Jesus da Costa, hateten, maske projetu ne’e la’o atrazu, maibé nia sente kontente no agardese ba governu ne’ebé planu ona projetu to’o implementa konstrusaun ponte ne’e hodi fasilita sira-nia movimentu ba-mai iha tempu ne’ebé presiza.

“Ami komunidade koléjiu agora sente kmaan ona tanba udan rezulta mota boot mai mós senti la ta’uk ona, uluk ne’e mota boot mai mak família ruma moras susar tebes ami atu lori ba ospitál, ne’e ami tenke hein to’o kleur mak foin liu. Uluk ne’e ami-nia família balun mate tanba mota lori, ne’ebé ho ponte ne’e ami sente moris livre ona,” nia orgullu.

Enkuantu ponte ne’e ho naruk metru 100 no luan  metru hitu. Projetu ne’e responsabiliza hosi kompañia Nananyo Join Venture Adam motor ho totál kontratu $2.860,755.65 hosi orsamentu Jerál Estadu (OJE) 2017 nian.

Ponte ne’e sei fasilita movimentasaun komunidade aldeia tolu kompostu hosi aldeia Daitete, Riti-Udu no Ma-hui ho totál populasaun 775 no uma-kain 218, inklui mós komunidade suku Manapa, postu administrativu Cailaco balu mós asesu.

Jornalista         : Sergio da Cruz

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here