Atleta hosi Federasaun Sky Timor -Leste, Yohan Gonçalves. imajen/espesial

DILI, 08 janeiru 2022 (TATOLI)– Atleta hosi Federasaun Sky Timor -Leste, Yohan Gonçalves sente orgullu no onradu bele reprezenta no lori naran Timor-Leste ba partisipa iha eventu internasionál Winter Olympic Games 2022 iha Beijing-Xina.

“Ha’u sente orgullu tebes tamba dala ida tan, hafoin liuhosi esforsu no luta ne’ebé difisil, ha’u bele reprezenta ha’u nia inan nia rai, Timor-Leste, iha jogu olimpyc ne’e. Ha’u fiar katak ha’u nia maun alin no inan feton sira iha Timor-Leste sei suporta ha’u, maske sira labele mai asiste diretamente kompetisaun ne’e,” Atleta Yohan, hateten liuhosi nota ne’ebé Agência TATOLI asesu, tersa ne’e.

Notísia relevante:  Atleta Yohan Gonçalves hahú prepara kompete iha Winter Olimpic Games

Nune’e, Atleta Timór-oan ne’e hato’o agradesementu ba ekipa hotu ne’ebé durante ne’e apoia ona nia hodi ba partisipa iha eventu ne’e.

“Obrigado ba ha’u nia ekipa, espesialmente ha’u nia treinadór, Federasaun Sky Timor-Leste no mós Governu Timor-Leste ne’ebé fó ona apoiu durante ne’e,” Alteta ne’e agradese.

Yohan Gonçalves dala ida tan reprezenta Timor-Leste iha jogus winter olimpyc ka olimpíada malirin ne’ebé ofisialmente abertura iha lorons sesta (04/02) iha Beijing-Xina.

Atleta ho idade 27 ne’e sei kompete iha kategoria “slalom’ jigante ne’ebé dahuluk ho kualifika fulan hirak liubá.

Tuir oráriu ba kurida sky sei hahú ho kurida iha kategoria Slalom jigante (Giant Slalom) ne’ebé sei hala’o iha domingu, 13 fevereiru, tuku 11:15 Otl. Enkuantu iha loron 16 fevereiru, Yohan sei kontinua kompete iha kategoria Slalom iha tuku 11:15 Otl.

Daudaun, jogu olimpíada malirin ne’e partisipa hosi nasaun 84 no sei ramata iha loron 20 fevereiru 2022.

Atleta hosi Federasaun Sky Timor -Leste, Yohan Gonçalves. imajen/ epesial

Partisipasaun Yohan nian iha jogu olimpíada malirin ne’e hanesan ba dala tolu ona liuliu ema hotu hatene katak atu kualifika ba jogu olimpikus, atleta nia pontu tenke menus hosi 140 liuhosi esforsu no kompetisaun barak.

Iha 29 dezembru 2013 iha kompetisaun ida iha Serbia, Yohan konsege klasifika dahuluk ba jogu olimpíada malirin ne’ebé hala’o iha sidade Sochi, Rusia iha 2014.

Liu tiha tinan haat, iha 2018, Yohan kualifika ba daruak ba jogu olimpíada malirin iha sidade Pyeongchang, Korea do Súl.

Iha fulan Novembru 2021, liuhosi kompetisaun kurida sky internasionál ne’ebé organiza hosi Federasaun Sky Timor-Leste (FSTL) iha Mall of Emirates, Dubai, nune’e iha eventu ne’e Yohan dala ida tan ba dala tolu tutuir malu kualifika ba jogus olimpíada malirin iha Beijing, China, ne’ebé oras ne’e la’o hela.

Liu tiha fulan ida, iha loron 22 – 23 dezembru iha kurida Timor-Leste no kurida Jamaika ne’ebé hala’o iha Montenegro, Yohan ba dala uluk kualifika ba kurida Slalom no mós Slalom jigante.

Yohan, hahú koñese sky desde nia halo tinan rua iha nia moris fatin iha França. kuandu nia halo tinan ualu no nia mehi hakarak reprezenta Timor-Leste iha jogu olimpíada ne’ebé ohin loron sai realidade.

Iha 2014, hafoin jogu olimpyc iha Sochi, Rusia, Governu Timor-Leste husu nia sai hanesan Embaixador ba Foinsa’e sira (Youth Ambassador) ne’ebé nia ho laran kontente asume.

Notísia relevante:  TL sei partisipa eventu Winter Olympic 2022 iha Xina 

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here