Udan no anin-boot sobu uma komunidade aldeia Oe-Leu Taz, suku Oe-Leu, postu administrativu Bobonaro, munisípiu Bobonaro. Imajen facebook.

BOBONARO, 07 fevereiru 2022 (TATOLI) –Vítima afetadu dezastre naturál uma-kain 20 iha aldeia Oe-Leu Taz, suku Oe-Leu, postu administrativu Bobonaro, munisípiu Bobonaro seidauk hetan apoia hosi Governu.

Xefe suku Oe-Leu, Januário Meta-Tae Bragança, fo-sai katak, família afetadu hirak-ne’e uma hetan estragu hosi anin-boot no rai nakfera ne’ebé akontese iha semana kotuk iha loron 02 fulan fevereiru tinan ne’e.

“Vítima uma-kain 20 ne’e, sira-nia uma anin loke hotu nia kakuluk, mais ida mak grave liu tanba rai halai ninia uma nakfera kotu iha klaran, to’o agora sira sei kontinua hela tanba governu seidauk fó apoiu ruma,” nia informa Agência Tatoli liuhosi telefónika, tersa ne’e.

Nia subliña, provizóriu vítima hirak-ne’e balun ne’ebé ninia uma hetan estragu totál tenke halai ba hela ho família sira, no balun ne’ebé kondisaun kalen sobu uma kakuluk kontinua hela nafatin maibé uma hirak-ne’e taka de’it ho lona no kalen aat ne’ebé anin sobu estraga.

Enkuantu problema ne’e líder komunitária aprezenta ona proposta ba administradór postu administrativu Bobonaro, atu submete ba kompetente maibé até agora seidauk hetan resposta emerjénsia ruma.

“Ha’u hanesan líder komunitáriu husu ba Ministériu Solidariedade Sosiál no Inkluzaun ho Sekretáriu Estadu Protesaun Sivíl sé bele aselera oituan hodi responde lalais. Sé udan ho anin mai tán agora uma sira-ne’e bele estragu totál,” nia husu.

Jornalista         : Sérgio da Cruz

Editór               : Evaristo Soares Martins 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here