Pesoál Saúde hala’o hela atendementu ba pasiente moras dengue iha salaun emerjénsia HNGV. Imajen Tatoli/Antonio ‘Dasiparu’

DILI, 08 fevereiru 2022 (TATOLI)— Diresaun Nasionál Saúde Públika liuliu Departamentu Vijilansia Epidemolojia iha Ministériu Saúde, hahú fulan-janeiru to’o horiseik pasiente dengue hamutuk 1.705, hosi númeru labarik na’in-28 mak mate ona.

“Situasaun kazu dengue iha Timor-Leste hosi janeiru mai too horiseik hamutuk kazu 1.705 no kumulativu óbitu na’in-28,” refere nota ne’ebé Agência TATOLI, tersa ne’e.

Notísia relevante: Dengue hamate labarik na’in-27 iha Timor-Leste

Maioria kazu ne’e deteta husi Munisípiu Dili ho totál 1.117, Baucau 78, Manatuto 120, Covalima 63, Ermera ho kazu 77, Manufahi 70, Viqueque 28, Ainaro 23, Liquiça 32, Aileu 33, Bobonaro 26, Lautem 35 no RAEOA na’in-tolu.

Munisípiu Dili nafatin rejista kazu ne’ebe a’as iha primeira semana to’o sesta semana fulan fevereiru 2022, ho totál kazu 1.117. Nune’e haree ba kada loron kazu aumenta bebeik hosi Munisípiu Dili.

To’o ohin loron hahú semana dahuluk fulan janeiru tinan 2022, kazu dengue hosi postu administrativu Dom Alexo iha 592, Cristo-Rei 228, Vera-Cruz 127 no Nain Feto 137.

Fasilidade saúde iha munisípiu Dili hanesan Hospitál Nasionál Guido Valadares (HNGV) rejista ona kazu dengue hamutuk 259, Klínika Fatumeta 132, Sentru Saúde Comoro 330, sentru saúde Vera-Cruz 50, sentru saúde Formoza 178, sentru saúde Becora 120 klinika madre eliza ida, Sentru Saúde Atauro 11, Sentru Saúde Metinaro 19, Klínika Bairru-Pité 13 no Klínika Motael na’in-rua.

Nune’e, Ministériu Saúde kontinua apela ba populasaun iha Dili laran no mós iha Munisípiu sira seluk, atu aprezenta-an iha fasilidade públiku saúde (Sentru Saúde ka Ospitál) ne’ebé besik, bainhira sente isin-manas, ka senti laran sa’e,liman-ain no sikun moras hodi bele hetan atendimentu husi profisionál saúde sira.

Apela mós Autoridade Munisipál no Autoridade Lokál atubele orienta komunidade halo limpeza jerál iha suku no bairru sira liuliu fase tanke, bidon ka balde tau bee semana ida dal aida.

Hamoos sasán ka limpeza hanesan roda aat, vazu ai-funan atu susuk labele tau tolun, haloot ropa ho di’ak iha ita nia uma laran,uza ropa ne’ebé liman naruk karik toba iha tempu loron, uza aimoruk hanesan repelente ka autan, uza moskiteru karik toba iha tempu loron, so’e lixu iha nia fatin.

Notísia relevante: Prevene dengue: MS halo fumigasaun rutina iha kapitál Dili

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here