Diretór Dirasaun Nasionál Organizasaun Urbana Ministériu Administrasaun Estatál, Hermínio Moniz Ribeiro. Imajen Tatoli/Julia Chatarina.

DILI, 08 fevereiru 2022 (TATOLI)—Diretór Dirasaun Nasionál Organizasaun Urbana (DNOU), Hermínio Moniz Ribeiro, hateten implementasaun programa pilotu resiklajen iha Munisípiu Dili ladún folin iha merkadu, nune’e programa resiklajen ne’e la kontinua to’o ohin loron.

Notísia Relevante: DNOU implementa programa pilotu resiklajen iha suku tolu

“Programa pilotu resiklajen ita termina ona iha 2021 ne’e. La kontinua ona tanba rezultadu resiklajen iha Dili ladún folin iha merkadu. Ikus mai indikadór labele atinje tanba kestaun konsiénsia, kestaun orsamentu, kestaun pandemia depois kestaun seluk mak kompradór ba rezultadu resiklajen ne’e laiha. Katak prodús resiklajen, resikla fali ba buat seluk no laiha folin tanba ne’e mak iha indikadór ualu ne’e ami atinje de’it indikadór haat (4),” Hermínio Moniz Ribeiro hateten ba Agência Tatoli iha nia knaar fatin Colmera, Dili, tersa ne’e.

Nia dehan, indikadór haat ne’ebé atinje ona mak; 1 Númeru hosi ema hodi hasa’e koñesimentu no konsiénsia kona-ba sustentabilidade jestaun lixu no prátika separasaun lixu.

  1. Númeru uma-kain sira ne’ebé prátika ona separasaun lixu ba rejeita, redús, resiklar, rekupera (4Rs) nu’udar rezultadu hosi atividade fasilidade jestaun lixu integradu ka Integrated Waste Managenment Facility (IWMF) nian.
  2. Númeru ema ne’ebé lori lixu resiklajen partikularmente lixu plástiku no lixu jardin ba sentru Integrated Waste Managenment Facility (IWMF) hodi troka ba foos ka kadernu.
  3. Númeru resiklajen ne’ebé mak rekolla lixu resiklajen hamoos, moos no rai didi’ak hosi Integrated Waste Managenment Facility (IWMF) nia kolesaun lixu hodi halo resiklajen.

Entretantu indikadór haat seluk ne’ebé lakonsege atinje mak; 1. Númeru negósiu resiklajen inisiante.

  1. Númeru produtu resiklajen ne’ebé prodús no faan iha Integrated Waste Managenment Facility (IWFM) kioske-verde ho nia montante médiu lukru hosi impreza individuál sira.
  2. Totál rezultadu rendimentu hosi Integrated Waste Managenment Facility (IWMF) ladún folin iha merkadu sira.
  3. Numeru ba parséria ba sosa-na’in lixu ka fornesedór potensiál ba produtu resiklajen mós mínimu.

Ho kestaun hirak-ne’e, Dirasaun Nasionál Organizasaun Urbana ho razaun ida katak tenke buka parseiru, nune’e bele finansia hodi kontinua programa refere.

Notísia Relevante: MTKI-Mercy Corps asina nota entendementu implementasaun projetu resiklajen

“Ami servisu hamutuk ho Banku Investimentu Eurepeia tanba sira hakarak investe iha resiklajen tanba ne’e ami-nia fixa avaliasaun ne’ebé mak hodi ami hato’o iha Banku Investimentu Eurepeia no sira aprova mós ba programa resiklajen ne’e,” nia dehan.

Nia garante ho parseiru ida-ne’e bele finansia no kontinua programa ne’e ho susesu no bele rezolve lixu iha Dili laran no bele resikla tan ba buat oioin. 

Orsamentu ba programa ne’e sei la mai hosi fundu infraestrutura Ministériu Administrasaun Estatál (MAE) nian maibé maihosi Banku Investimentu Europeia nian.

“Ami-nia estratejia atu kontinua implementa ba suku seluk maibé tinan 2022 ita orsamentu laiha entaun ita termina, maibé MAE iha polítika hamutuk ho parseiru hanesan atu bele kontinua,” nia dehan.

Programa ne’e nia prosesu to’o ona iha konfirmasaun fixa avaliasaun nian hosi  Dirasaun Nasionál Organizasaun Urbana depois bainhira hetan desizaun mak hahú ona pre-viabilidade nian.

Kona-ba osan, nia dehan, sei iha faze diskusaun ne’ebé seidauk bele hatene nia montante hira mak aloka ba programa refere.

Antes ne’e, MAE liuhosi Dirasaun Nasionál Organizasaun Urbana implementa ona iha suku haat (4) programa pilotu resiklajen iha suku Motael, Kampung Alor, Caicoli no Colmera, iha munisípiu Dili.

“Tanba pilotu ita halo tiha ona signifika ita iha ona referénsia mak iha suku Motael, Kampung Alor, Caicoli no Colmera. Bainhira ita servisu hamutuk ho parséria mak finaliza ona diskuzaun no avaliasaun mak ita bele kontinua implmenta programa resiklajen ne’e,” nia hateten.

Notísia Relevante: Presiza Kria Polítika Resiklajen

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here