Komandante PNTL Baucau, Superintendente Xefe António Maria de Sá, hamutuk ho Komandante eskuadra sira hala’o konferénsia imprensa iha Komandu PNTL Baucau, Vila Nova, tersa (08/02). Imajen TATOLI/Natalino Belo

BAUCAU, 08 janeiru 2022 (TATOLI) – Komandu Polísia Nasionál Timor-Leste (PNTL) munisípiu Baucau menus rekursu umanu atu hasoru eleisaun prezidensiál.

“Rekursu umanu ba eleisaun prezidensiál  nian ita sei menus, tuir pedidu hosi komandu PNTL Baucau ba komandu jerál presiza tán reforsa rekursu umanu hamutuk na’in-110,” Superintendente Xefe hateten iha ninia kna’ar-fatin Vila Nova, tersa ne’e.

Superintendente Xefe António de Sá, hato’o informasaun ne’e liuhosi sorumutuk entre komando ho komandante eskuadra ko’alia kona-ba asuntu haat hanesan avaliasaun serbisu, transmite informasaun no oreintasaun hosi komando jerál ba komandante skuadra hotu ligadu preparasaun kampaña no eleisaun prezidensiál no preparasaun serimónia loron veteran ne’ebé selebra iha loron 3 fulan marsu.

Liuhosi enkontru ne’e komandu Baucau identifika difikuldade rekursu ne’ebé PNTL Baucau hasoru, rekursu umanu, ekipamentu hanesan transporte inklui fasilidade seluk ne’ebé pertenente ligadu ho kestaun segurasa kona-ba situasaun kampaña no eleisaun prezidensiál.

Pedidu aumenta membru ho razuan tanba sentru votasaun iha Baucau hamutuk 125 no estasaun votu hamutuk 150 nune’e difikulta atu destaka membru sira tuir sentru no estasaun votu.

Komandu Baucau rasik tótal membru hamutuk na’in-205, ativu na’in-203 no na’in-rua seluk kondisaun moras, iha mós membru balun mak suspensaun nune’e ativu loloos hamutuk na’in-189.

PNTL Baucau sei halo esforsu hotu liuhosi maneira sei destaka membru tuir gravidade krime hanesan sentru votasaun  iha Baucau Vila tanba besik iha eskuadra no komandu PNTL presiza de’it na’in-ida, enkuantu iha área remota ho grau ameasa aas presiza reforsa membru na’in-rua ka liu depende gravidade ameasa.

PNTL Baucau identifika difikuldade seluk hanesan kondisaun estrada, distánsia sentru votasaun ho suku, liña eletrisidade iha fatin votasaun, liña telekomunikasaun, transporte ba komandante eskuadra no OPS sira-ne’ebé kondisaun ladi’ak.

Komandu PNTL Baucau kontinua koopera ho FALINTIL-FDTL inklui Batallaun Ordem Públiku (BOP) ho autoridade lokál sira hanesan xefe suku, aldeia no Ofisiál Polísia Suku (OPS), KPK atu envolve iha parte seguransa nune’e iha ambiente pás no dame hodi fó susesu iha festa demokrasia.

PNTL Baucau rasik garante festa demokrasia sei lao ho sussesu nune’e ezije atu entidade hotu hamutuk kolabora atu kontribui ba pás no estabilidade liuhosi fornese informasaun ba komandu hodi foti medida preventiva.

Jornalista         : Natalino Belo

Edictór             : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here