Plenaria Parlamentu Nasional. Imajen Tatoli Antonio Goncalves.

DILI, 08 fevereiru 2022 (TATOLI)—Parlamentu Nasionál, tersa ne’e liuhosi reuniaun plenária kontinuasaun halo re-apresiasaun iha finál global ba alterasaun lei Konsensaun Indultu no Komutasaun Pena ne’ebé antes ne’e hetan veta hosi Prezidente Repúblika.

Notísia Relevante: PN Sei Konsidera Pedidu Prezidente Repúblika Atu Altera Lei Indultu

Re-apresiasaun foun dekretu Parlamentu Nasionál númeru 50/V-primeiru alterasaun lei númeru 5/2016,25 maiu ne’ebé estabelese prosedimentu konsensaun indultu no komutasaun pena iha finál global ho rezultadu votu a-favór 40, kontra 0 no abstensaun 4.

“Nune’e dekretu lei númeru 50 Parlamentu Nasionál aprova no komisaun A (trata Asuntu Justisa no Konstituisionál) rezolve redasaun finál tarde liu diploma refere haruka ba Prezidente Repúblika iha lorokraik ne’e,” Prezidente Parlamentu Nasionál, Deputadu Aniceto Longuinhos Guterres Lopes, deklara iha sala plenária Parlamentu Nasionál.

Prezidente Komisaun A, Joaquim dos Santos, hateten mensajen Prezidente Repúblika (PR) veta alterasaun lei ne’e katak lejisladór labele halo limita kompeténsia Prezidente Repúblika ho radikál tuir konstituisaun no bele halo limitasaun so ba kazu sira-ne’ebé sensitivu.

Tanba ne’e iha diskusaun re-apresiasaun deputadu proponente Joaquim dos Santos, Francisco de Vasconcelo, António da Conceição, David Dias Ximenes, Francisco David Carlos no Luis Roberto aprezenta proposta hodi elimina ka hasai tiha iha artigu 4 (krime insussetiveis indultu) hosi testu orijinál alterasaun lei refere.

Iha proposta seluk mak iha artigu 8 (pareser no remesa autos), hodi fó marjen ba Governu bele iha flexibilidade atu haruka dokumentasaun ba Prezidente Repúblika kria kondisaun indultu karik fó opinaun antes bainhira PR husu tanba PR molok fó indultu rona uluk Governu, Ministériu Públiku no Tribunál, maibé iha testu orijinál hosi artigu ne’e tau prazu loron 10 maibé muda fila-fali ba loron lima.

Enkuantu, testu orjinál antes ne’e tuir  relatóriu no paresér ne’ebé Agência TATOLI asesu katak, projetu-lei atu altera artigu hamutuk haat hosi Lei númeru 5/2016, 25 maiu, ne’e kompostu hosi artigu 4 (krime insussetível indultu), artigu 5 (Data anuál ba konsesaun ba indultu no komutasaun pena), artigu 8 (paresér no remesa autos) no artigu 9 (dekretu prezidensiál no libertasaun imediata rekluzu).

Alterasaun proposta iha projetu-lei; Artigu 4 (krime insussetível indultu) (textu orijinál) esplika, pena prizaun hosi arguidu sira-ne’ebé kondenadu ne’ebé rezulta hosi kazu terrorizmu, kriminalidade violenta ka altamente organizada nu’udar insussetível indultu ka komutasaun pena.

Nune’e Komisaun A konklui katak komparasaun entre testu atuál (orijinál) no textu alterasaun ho intensaun subjasente alterasaun artigu ne’e, nune’e prodús testu ida-ne’ebé klaru liu no ho linguajen ne’ebé direita liu.

Notísia Relevante: Plenária baixa alterasaun Lei Konsesaun Indultu-Komutasaun Pena ba Komisaun A

Ezemplu, testu atuál privilijia iha identifikasaun krime, kualifikasaun konduta, asosiada no kazu sira seluk, ho forma ezekusaun krime. Elenku (elenco) hosi krime ne’e sofre alterasaun kiik (pequenas alterações).

Nune’e mós halakon alínea d númeru 3 hosi artigu 4, ne’ebé previstu, integra krime alterasaun Estadu Direitu, koasaun kontra óragun konstitusionál, serbisu ka kolaborasaun ho forsa inimiga sira, sabotaje kontra defeza nasionál, violasaun segredu no infidelidade diplomátika, dezde krime forma violenta ka organizada.

Razaun halo alterasaun tanba elenku hosi krime kontra seguransa Estadu previstu ona iha artigu 196, 203, 205 no 206 iha Kódigu Penál (CP, sigla portugés).

Artigu 5 (Data anuál ba konsesaun ba indultu no komutasaun pena), testu orijinál esplika, indultu no komutasaun pena bele konsedidu iha duas datas anuál ne’ebé define hosi Prezidente Repúblika. 

Iha proposta alterasaun ba artigu 5 define nune’e: adisiona ba atuál konteúdu hosi artigu ne’e; (i) dahuluk, forma ato (atu) Prezidente Repúblika ba konsesaun indultu ka komutasaun pena; (ii) daruak, impór ba publikasaun iha Jornál Repúblika. iha sikun seluk, konfere podér ba Prezidente Repúblika hodi fixa data limita kona-bá indultu ne’ebé aprezenta hosi Ministru Justisa.

Artigu 8 (paresér no remesa autos) ne’ebé fixa iha testu orijinál hateten: Finda instrusaun, auto kontinuadu ho vista ba Ministériu Públiku, ne’ebé emite paresér iha prazu loron lima (5).

Nune’e mós resebidu paresér ne’ebé refere númeru anteriór, juiz pronunsia iha prazu loron lima (5) no ordena remesa autos ba Ministru Justisa, ne’ebé leva desizaun Prezidente Repúblika nian.

Iha proposta alterasaun propoin nune’e, pretende hodi introdús norma atribuisaun kompeténsia ba Ministru Justisa. Akordu ho projetu-lei ne’e kabe ba Ministru Justisa, hodi halo verifikasaun regularidade intrusaun hosi prosesu no verifikasaun preenximentu hosi rekizitu legál konsesaun ba indultu ka komunikasaun pena (númeru 3 no númeru 4 hosi artigu 8 iha redasaun projetu-lei ne’e).

Nune’e mós kazu prosesu ne’ebé inkompletu la komprimenta rekizitu legál, Ministru Justisa notifika rekerente atu kompleta ka halo kontestasaun (númeru 5 hosi artigu 8 iha projetu-lei ne’e).

Artigu 9 (dekretu prezidensiál no libertasaun imediata rekluzu), artigu ne’e adisiona númeru foun rua atu kontempla posibilidade Prezidente Repúblika “subordina konsesaun indultu ka komutasaun pena” ho kondisaun ida, ne’ebé aplika ba kazu rejime ne’ebé previstu iha artigu 69 hosi Kódigu Penál (CP, sigla portugés).

Entretantu, Lei númeru 5 /2016, 25 Maiu, kona-ba Prosedimentu Konsesaun Indultu no Komutasaun Pena (lei vijente) ne’e iha artigu hamutuk 11.

Lei refere define iha artigu 10 kona-ba revogasaun, númeru 1 hateten indultu no komutasaun pena bele revoga liuhosi dekretu prezidensiál, até momentu ne’ebé okorreria ho termu pena.

Númeru 2 hosi artigu ne’e dehan, revogasaun no promovida hosi Ministériu Públiku ofisiozamente ka solisitasaun hosi Ministru Justisa.

Númeru 3 hosi artigu ne’e hatutan, realizada dilijénsia instrutóriál pertinente, juiz mak pronunsia no ordena remesa autos ba Ministru Justisa, ne’ebé sei haruka Prezidente Repúblika hodi hola desizaun.

Númeru 4 hosi 10 ne’e hateten, dekretu prezidensiál ne’ebé revoga indultu no komunika ba kondenadu, ba Ministériu Públiku no ba respetivu prosesu kondenasaun.

Notísia Relevante: PN aprova proposta-lei estabelese asosiasaun públika profisionál iha jeneralidade

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here