Ministru Agrikultura no Peska (MAP), Pedro dos Reis. Imajen TATOLI/Francisco Sony

DILI, 08 fevereiru 2022 (TATOLI)—Planu Ministériu Agrikultura no Peska (MAP) iha tinan ne’e atu halo akizisaun fini nuu hosi nasaun Indonézia, Malázia no Tailándia, iha hela prosesu tanba situasaun COVID-19.

“Planu atu sosa fini nuu 10.000 hosi nasaun tolu atu halo revitalizasaun iha rai ektare 100 iha munisípiu Viqueuqe no fatin seluk, agora iha hela prosesu tanba daudaun situasaun COVID-19, ne’ebé númeru moras ne’e sa’e iha nasaun sira ne’ebé ita atu sosa nuu,” Ministru, Pedro dos Reis informa ba Agência TATOLI,  iha salaun MAP, Comoro, tersa ne’e.

Notísia relevante: MAP planeia sosa fini nuu hosi nasaun-tolu hodi lori varidade

Iha sorin seluk, Diresaun Nasionál Agro-Komérsia halo hela preparasaun másimu iha terrenu atu esforsu lalais sosa fini nuu.

“Ha’u fó ona orientasaun ba Diresaun Nasionál Agro-Komérsia atu prosesa lalais iha terrenu, tanba planu atu sosa no kuda ne’e tenke mai ho variadade di’ak, entaun ita tenke ba foti fini ne’ebé kualidade,” nia akresenta.

Maski ho situasaun COVID-19, maibé iha meiu buka atu aselera prosesu tanba preparasaun iha terrenu iha ona.

Nune’e mós, Embaixadór Indonézia ba Timor-Leste, Okto Dorinus Manik, hateten, kona-ba atu revitaliza nuu iha Viqueque, sira-nia parte prontu fó apoiu tékniku iha Rai-tahu Viqueque hodi halo revitalizasaun nuu.

“Espera COVID-19 ne’e bele lakon, nune’e movimentasaun entre nasaun rua bele la’o normál, tanba prosedur ne’ebé kada nasaun aplika la hanesan,” nia tenik.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

2 KOMENTÁRIU

  1. Buat kiik boot sosa hotu husi rai liur,Buat nebe ita bele halo lapersiju sosa iha rai liur,ejemplu maka fini nuu nian nusa maka tengki sosa hotu iha rai liur,aktividade sira hanesan nee tuir lolos la merese akontese iha ita nia nasaun,basa osan sei sai hotu ba rai liur,desempregu aumenta tamba Timor oan rasik sai penonton ba fatin servisu iha nia rain rasik,husu guvernu atu tetu didiak no hakribi sosa sasan sira hanesan nee husi ema nia rain,tamba la arbiru nasaun seluk lori osan atu sosa sasan sira hanesan nee husi ita nia rain lori ba sira nia rain.

  2. Primeiru-Ministru presiza halo avaliasaun ba nia membru sira, inklui Ministru ida-ne’e. Ha’u konkorda ho saida maka maun-alin Jose Maria da Silva Koli dehan iha leten, katak tanba sá maka ki’ik boot gosta importa de’it? Será que nuu hotu-hotu iha Timor ne’e la iha kualidade? ha’u hanoin lae karik, ita maka hatene halo selesaun, ida-ne’ebé maka bele sai fini ida-ne’ebé maka lae. Se Ministru iha hanoin atu halo halo revitalizasaun ba plantasaun nuu nian hirak ne’ebé temi iha leten, haruka ita nia ema ba tuir formasaun iha espesialidade nuu nian atu nune’e sira bele halo viveiru iha ita-nia rain hodi kuda. Foin daudaun ko’alia importa manu, agora nuu fali ona, la hatene, oinmai ne’e atu importa saida karik? Bele-bele asu karik tanba asu sira iha Timor-ne’e mesak rasa la diák de’it. Hahahah

HAKEREK NO HATÁN

Please enter your comment!
Please enter your name here