Ministru Turizmu Komérsiu no Indústria, José Lucas do Carmo da Silva, entrega buletin SOP ba Diretór Jerál Ministériu Turizmu Komérsiu no Indústria, iha salaun MTKI, Bebora, tersa (08/02). Imajen TATOLI/Francisco Sony

DILI, 08 fevereiru 2022 (TATOLI)—Ministériu Turizmu Komérsiu no Indústria (MTKI), tersa ne’e, lansa buletin Padraun Prosedimentu Operasionál (SOP, sigla inglés) hodi guia simplifika burokrasia iha ministériu laran no asegura funsionamentu atendimentu públiku ho kualidade.

Ministru Turizmu Komérsiu no Indústria, José Lucas do Carmo da Silva. Imajen TATOLI/Francisco Sony

“Ida-ne’e giun ka padraun ida ba ami atu ami simplifika burokrasia iha prosesu atendimentu ministériu laran tomak, hahú hosi gabinete ministériu to’o fali diresaun kiik-oan sira no fasilita públiku tomak ne’ebé ami atende, habadak burokrasia tempu sira atu servisu ho efikásia no efisiénsia,” Ministériu Turizmu Komérsiu no Industria, José Lucas do Carmo da Silva, hateten, iha salaun MTKI, Bebora.

Notísia relevante: MF no MTKI selebra akordu kooperasaun iha área peskiza-estatístika

Livru ne bele tulun funsionáriu hatene idaidak ninia funsaun ho di’ak no tau iha prátika no hatene envolvimentu iha kada prosesu no atendimentu saida mak bele kontribui hodi sai hanesan barometru ida atu sukat prosesu atendimentu.

Ministru Turizmu Komérsiu no Indústria, José Lucas do Carmo da Silva, asina iha buletin SOP ne’ebé lansa. Iha salaun MTKI, Bebora tersa (08/02). Imajen TATOLI/Francisco Sony

Inisiativa ne’e mai ho hanoin atu hadi’a jestaun instituisionál MTKI, tanba iha VIII Governu Konstituisionál, ministériu ne’e ho estrutura boot, tuir lei orgánika númeru 66/2020 ne’ebé altera tiha lei orgánika númeru 12/2019, kona-ba MTKI nia organograma, ne’ebé kompostu hosi Diresaun Jerál haat, Diresaun Nasionál 16, no instituisaun autónomu haat, hodi implementa atividade sira iha área turístiku komersiál no industriál.

Aleinde ne’e, MTKI fó atensaun mós ba promosaun boa-governasaun, ne’ebé ezemplu prátika hosi inisitiva ne’e mak promove transpéransia no akuntabilidade liuhosi mídia ministériu ninia papél, ne’ebé kontinua públika informasaun kona-ba programa no atividade, liuhosi publikasaun boletin trimestrál ministeriál.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here