Membru Governu ne’ebé integra iha komisaun interministeriál foto hamutuk, hafoin partisipa reuniaun interministeriál daruak ba adezaun Timor-Leste ba OMK, iha Otél Novo Turismo, tersa (08/02. Imajen TATOLI/ Antonio Dasiparu

DILI, 08 fevereiru 2022 (TATOLI)—Ministériu Koordenadór Asuntu Ekonómiku (MKAE), tersa ne’e, lidera reauniaun komisaun interministériál faze daruak hodi atualiza progresu serbisu hirak ne’ebé Timor-Leste halo ona iha ámbitu adezaun ba Organizasaun Mundiál Komérsiu (OMK).

Ministru Koordenadór Asuntu Ekonómiku no Xefe Negosiadór Timor-Leste ba OMK, Joaquim Amaral. Imajen TATOLI/António Dasiparu

“Ha’u haksolok tebes, tanba iha tinan 2022 ita hahú inisia sesaun traballu hodi halo reuniaun hamutuk ho membru Governu sira ne’ebé pertense iha komisaun interministeriál, atu haree progresu serbisu ne’ebé atinje ona  no estratejia di’ak sira, atu nune’e bele hakat ba oin tuir kalendáriu indikativu ne’ebé ita simu ona,” Ministru Koordenadór Asuntu Ekonómiku no Xefe Negosiadór Timor-Leste ba OMK, Joaquim Amaral hateten, iha Otél Novo Turismo, Bidau Lecidere.

Notísia relevante: Komisaun interministeriál atualiza serbisu adezaun Timor-Leste ba OMK

Antes ne’e, realiza ona enkontru grupu traballu altu nível dala-rua iha tinan 2021, ne’ebé Timor-Leste halo ezaminasaun dokumentu sumáriu fatuál no rona pareser hosi país membru OMK ne’ebé apresia tebes ho kompromisu polítiku a’as Governu Timor-Leste.

Reuniaun komisaun interministeriál daruak hodi prepara adezaun Timor-Leste ba OMK, iha Otél Novo Turismo, Bidau Lecidere, tersa (08/02). Imajen TATOLI/António Dasiparu

Tanba ne’e, hanesan nasaun ne’ebé hola parte iha país ne’ebé menus dezenvolvidu, Timor-Leste kontinua prodús dokumentu ba negosiasaun ho kualidade di’ak, atu nune’e bele dudu reforma iha rai-laran hodi integra ba sistema komérsiu rejionál no mós mundiál.

“Ohin ita entrega mós relatóriu anuál ba liña ministeriál sira kona-ba progresu adezaun Timor-Leste ba OMK, hahú hosi jullu 2020 to’o jullu 2021, hosi ekipa grupu traballu ne’ebé antes ne’e halo vizita ba Jeneva, Suísa iha loron 27 novembru to’o 03 dezembru 2021,” governante ne’e relata.

Objetivu entrega progresu relatóriu anuál, atu atualiza ba membru Governu ne’ebé hola parte iha komisaun kona-ba prosesu adezaun ba organizasaun.

Membru Governu ne’ebé integra iha komisaun interministeriál foto hamutuk, hafoin partisipa reuniaun interministeriál daruak ba adezaun Timor-Leste ba OMK, iha Otél Novo Turismo, tersa (08/02. Imajen TATOLI/ Antonio Dasiparu

“Prezidente grupu traballadór iha Jenebra, Embaixadór Rui Maciera atualiza ba membru Governu ne’ebé hola parte iha komisaun interministeriál kona-ba apresiasaun Estadu membru OMK ba Timor-Leste nia serbisu no progresu, ne’ebé relata iha relatóriu. Pergunta sira ne’ebé Estadu membru sira haruka mai Timor-Leste, hatan ona no haruka ba Sekretariadu hodi pasa ba Estadu membru no hetan apresiasaun, tanba ne’e mak sira kontinua interese fó pergunta ba ita,” Ministru dehan.

Sesaun ohin atualiza mós kona-ba serbisu iha tinan 2022 no kalendáriu ba reuniaun grupu traballu tuir mai.

“Rekezitu ne’ebé ita presiza kompleta ba adezaun OMk mak preparasaun atubele hakat ba negosiasaun bilaterál kona-ba oferta ba merkadu produtu no merkadu serbisu,” nia salienta.

Reuniaun komisaun interministeriál daruak hodi prepara adezaun Timor-Leste ba OMK, iha Otél Novo Turismo, Bidau Lecidere, tersa (08/02). Imajen TATOLI/António Dasiparu

Durante ne’e Timor-Leste hamutuk ho país 22 seluk sai observadór hodi akompaña prosesu no kumpre rekezitu hodi sai membru hanesan ho nasaun 164 sira seluk.

Hanesan país observadór, Governu estabelese grupu traballu ba OMK hanesan komité traballu hodi halo preparasaun, negosiasaun, prienxe rekezitu no tuir enkontru koordenasaun ho Estadu membru.

Adezaun ba organizasaun mundiál ne’e ho hanoin ida katak Governu bele halo parseria ho setór privadu nasionál no internasionál atu loke kampu traballu ba timor-oan.

OMK hanesan organizasaun ne’ebé regula komérsiu entre país sira ho objetivu atu garante katak atividade komersiál hotu la’o ho forma fasil, livre, previzível no posível.

Jornalista : Arminda Fonseca

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here