Imajen/Media PR.

DILI, 04 maiu 2021 (TATOLI)—Komisaun A trata asuntu Justisa no Konstituisional finaliza ona diskusaun proposta-lei estabelese rejime jurídiku ba asosiasaun profisionál sira iha faze espesialidade.

Notísia Relevante: PN aprova proposta-lei estabelese asosiasaun públika profisionál iha jeneralidade

“Foin iha semana kotuk komisaun reuni iha Suai (Covalima) diskute iha espesialidade finaliza ka aprova ona ho unanimidade kona-ba Rejime Jurídiku ne’ebé relatóriu paresér haruka ona ba meza Prezidente Parlamentu Nasionál hodi ajenda ba diskusaun iha finál global,” Prezidente Komisaun A, Joaquin dos Santos, informa ba Agencia Tatoli iha Parlamentu Nasionál, tersa ne’e.

Nia dehan, iha debate espesialidade ne’e aprova artigu 33 ho rekomendasaun ba Parlamentu Nasionál nisiativa lejislativa ne’e prenxe rekezitu konstituisionál, legál tuir rejimentu.

“Iha diskusaun ne’e iha artigu balun mak halo aditamentu rua kona-ba finanseira no ida kona-ba transferénsia bainhira orden harii sira-nia estatutu tenke define regra transferénsia ligadu informasaun ba públiku,” Deputadu Joaquim hateten

Proposta-lei númeru 25/V/(3a), estabelese rejime jurídiku ida ba Asosiasaun Públika Profisionál ne’ebé aprezenta hosi Governu liuhosi Ministériu Justisa no substánsia hosi proposta-lei atu hamosu rejime jurídiku ida ba asosiasaun públika profisionál sira.

Proposta-lei ne’e kompostu hosi artigu hamutuk 33 no kapítulu neen (6). Kapítulu I kona-ba dispozisaun jerál ho artigu 12, kapítulu II kona-ba organizasaun no funsionamentu internu ho artigu hamutuk lima (5), kapítulu III kona-ba ezersísiu no asesu ba profisaun artigu neen (6).

Nune’e mós kapítulu IV kona-ba rejime laborál, finanseiru no fiskál ho artigu hamutuk tolu (3), kapítulu V kona-ba tutela, kontrolu no responsabilidade ho artigu hamutuk lima (5) no kapítulu VI kona-ba norma tranzitória no finál ho artigu hamutuk rua (2).

Prezidente Komisaun A, Deputadu Joaquim dos Santos, esplika proposta-lei ne’e atu hamosu rejime ida hodi regula asosiasaun públika sira no atu hamoris profisionál públika sira-nian iha Timor-Leste.

Jornalista : Nelson de Sousa

Editór      : Cancio Ximens

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here